جاڭا جىلدان باستاپ جالپىعا بىردەي دەكلاراسيالاۋعا كوشۋدىڭ العاشقى كەزەڭى جۇزەگە اسىرىلادى – 2020 جىلدىڭ 10 جەلتوقسانىندا پرەزيدەنت «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە (سالىق كودەكسى) وزگەرىستەر مەن تولىقتىرۋلار ەنگىزۋ تۋرالى» ق ر زاڭىنا قول قويدى. قۇجات نورمالارىنا سايكەس 2021 جىلدىڭ 1 قاڭارىنان باستاپ ەلىمىزدە جالپىعا بىردەي دەكلاراسيالاۋ جۇيەسى ەنگىزىلەدى، دەپ حابارلادى ق ر قم مەملەكەتتىك كىرىستەر كوميتەتىنىڭ باسپا ءسوز قىزمەتى.
سالىق كودەكسىندە جالپىعا بىردەي دەكلاراسيالاۋدى ءتورت كەزەڭمەن جۇزەگە اسىرۋ قاراستىرىلعان.
2021 جىلدىڭ 1 قاڭتارىنان باستالاتىن ءبىرىنشى كەزەڭدە اكتيۆتەر مەن مىندەتتەر جونىندەگى دەكلاراسيانى جاۋاپتى مەملەكەتتىك لاۋازىمداعى تۇلعالارمەن ولاردىڭ جۇبايلارى؛ مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن جانە ولارعا تەڭەستىرىلگەن تۇلعالارمەن ولاردىڭ جۇبايلارى، سونداي-اق «قازاقستان رەسپۋبليكاسىنداعى سايلاۋ تۋرالى» ق ر كونستيتۋسيالىق زاڭىنا جانە «سىبايلاس جەمقورلىققا قارسى ءىس-قيمىل تۋرالى»، «قازاقستان رەسپۋبليكاسىنداعى بانكتەر جانە بانك قىزمەتى تۋرالى»، «ساقتاندىرۋ قىزمەتى تۋرالى»، «باعالى قاعازدار رىنوگى تۋرالى» قازاقستان رەسپۋبليكاسىنىڭ زاڭدارىنا سايكەس دەكلاراسيا ۇسىنۋ جونىندەگى مىندەت جۇكتەلگەن تۇلعالار تاپسىرادى.
بۇل دەكلاراسيا، دەكلاراسيالاۋ جۇيەسىنە ەنگىزۋ مەزەتىندە سول ۋاقىتقا اكتيۆتەردىڭ كولەمىن بەلگىلەۋ جانە ودان ءارى مۇلىكتىڭ ءوسىمىن مونيتورينگىلەۋ ءۇشىن ءبىر رەت ۇسىنىلادى. جوعارىدا اتالعان ازاماتتار اكتيۆتەر مەن مىندەتتەر تۋرالى دەرەكتەردى 2020 جىلدىڭ 31 جەلتوقسانىنداعى جاعداي بويىنشا كورسەتۋگە ءتيىس.
اتاپ ايتقاندا، ول بويىنشا قۇقىق جانە (نەمەسە) كەلىسىم-شارت شەتەل مەملەكەتىنىڭ زاڭناماسىنا سايكەس شەتەل مەملەكەتىنىڭ قۇزىرلى ورگانىندا مەملەكەتتىك نەمەسە وزگە دە تىركەۋگە جاتاتىن مۇلىك دەكلاراسيادا كورسەتىلۋى ءتيىس. كورسەتىلەتىن مۇلىك تىزىمىنە سونداي-اق، جىلجىمايتىن مۇلىك، جەر ۋچاسكەلەرى جانە (نەمەسە) جەر ۇلەستەرى، اۋە جانە تەڭىز كەمەلەرى، ىشكى سۋلاردا ءجۇزۋ كەمەلەرى، «وزەن-تەڭىز» ءجۇزۋ كەمەلەرى، كولىك قۇرالدارى، ارنايى تەحنيكالار جانە (نەمەسە) تىركەمەلەر، ق ر اۋماعىنان تىس، شەتەلدىك بانكتەردىڭ ەسەپشوتىندا ساقتالعان بارلىق بانكتىك سالىمدارى بويىنشا رەسپۋبليكالىق بيۋدجەت تۋرالى زاڭمەن بەلگىلەنگەن جانە ەسەپتى سالىق كەزەڭىنىڭ 31 جەلتوقسانىنا دەيىنگى قولدانىستاعى ەڭ تومەنگى ەسەپتىك كورسەتكىشتىڭ 1000 ەسەلەنگەن اقشا قاراجاتى جاتادى.
سونىمەن قاتار، قر-عى جانە (نەمەسە) ونىڭ اۋماعىنان تىسقارى جەرلەردەگى مۇلىكتەرى تۋرالى، ياعني تۇرعىن ءۇي قۇرىلىسىنداعى ۇلەسكەرلىك قاتىسىمى تۋرالى كەلىسىم بويىنشا تۇرعىن-جايداعى ۇلەسى؛ ق ر اۋماعىنان تىسقارى جەرلەردە قۇرىلعان زاڭدى تۇلعانىڭ جارعىلىق كاپيتالىنداعى قاتىسۋ ۇلەسى، قۇندى قاعازدار، تۋىندى قارجى قۇرالدارى (اتقارىلۋى بازالىق اكتيۆتى ساتىپ الۋ نەمەسە ساتۋ ارقىلى جۇرگزىلەتىن تۋىندى قارجى قۇرالدارىنان وزگە)، ينۆەستيسيالىق التىن، ينتەللەكتۋالدىق مەنشىك نىساندارى، اۆتورلىق قۇقىق تۋرالى دەرەكتەردى كورسەتۋ قاجەت.
سونداي-اق، رەسپۋبليكالىق بيۋدجەت تۋرالى زاڭدا بەلگىلەنگەن جانە جەكە تۇلعانىڭ اكتيۆتەرى مەن مىندەتتەمەلەرى تۋرالى دەكلاراسيا تاپسىرعان جىلدىڭ الدىنداعى جىلدىڭ 31 جەلتوقسانىنداعى جاعداي بويىنشا ەسەپتەلگەن ەڭ از ەسەپتىك كورسەتكىشتىڭ 1000 ەسەلەنگەن مولشەرىنەن اسپايتىن مولشەردەگى قولما-قول اقشا؛ قر-داعى بانكتەر جانە بانك قىزمەتى جونىندەگى قازاقستان رەسپۋبليكاسىنىڭ زاڭدارىنا سايكەس قۇرىلعان بانكتەر مەن بانك وپەراسيالارىنىڭ جەكەلەگەن تۇرلەرىن جۇزەگە اسىراتىن ۇيىمدار الدىنداعى بەرەشەكتەردى قوسپاعاندا، مىندەتتەمە نەمەسە تالاپ تۋىنداۋىنا نەگىز بولاتىن، نوتاريالدى كۋالاندىرىلعان كەلىسىمشارت نەمەسە باسقا قۇجات بولعان كەزدە جەكە تۇلعالاردىڭ بىرەۋلەر الدىنداعى قارىزدارى (كرەديتورلىق بەرەشەك) جانە (نەمەسە) باسقا تۇلعالاردىڭ جەكە تۇلعا الدىنداعى قارىزدارى (دەبيتورلىق بەرەشەك) كورسەتىلەدى.
سونداي-اق، جوعارىدا كورسەتىلگەن تۇلعالاردىڭ بىرلىك باعاسى رەسپۋبليكالىق بيۋدجەت تۋرالى زاڭدا بەلگىلەنگەن جانە ەسەپتى سالىق كەزەڭىنىڭ 31 جەلتوقسانىنا دەيىن قولدانىستا بولاتىن ەڭ تومەنگى ەسەپتىك كورسەتكىشتىڭ 1000 ەسەلەنگەن مولشەرىنەن اساتىن ونەر تۋىندىسى سەكىلدى جانە ت.ب.، قىمبات باعالى مۇلكى بولعان جاعدايدا، ەگەر ول قازاقستان رەسپۋبليكاسىنىڭ باعالاۋ قىزمەتى تۋرالى زاڭناماسىنا سايكەس باعالاۋشى مەن سالىق تولەۋشى اراسىنداعى كەلىسىم بويىنشا جۇزەگە اسىرىلعان باعالاۋ تۋرالى ەسەپتە ايقىندالعان ءمان بولسا، دەكلاراسيا تاپسىرۋشى ونى ءوز ەركى بويىنشا دەكلاراسيادا كورسەتۋگە قۇقىلى.
مەملەكەتتىك نەمەسە وزگە تىركەۋگە جاتاتىن مۇلىكتى، سونداي-اق ولار بويىنشا قۇقىقتار جانە (نەمەسە) مامىلەلەر مەملەكەتتىك نەمەسە وزگە دە تىركەۋگە جاتاتىن مۇلىكتەردى قوسپاعاندا.
جالپىعا بىردەي دەكلاراسيالاۋدىڭ ءبىرىنشى كەزەڭىنە كىرەتىن ادامدار ءۇشىن تۇرعىلىقتى جەرى (كەلۋ ورنى) بويىنشا دەكلاراسيانى قاعاز نۇسقادا تاپسىرۋ مەرزىمى – 2021 جىلدىڭ 15 شىلدەسىنەن كەشىكتىرمەي نەمەسە ەلەكتروندىق نۇسقادا – 2021 جىلدىڭ 15 قىركۇيەگىنەن كەشىكتىرىلمەۋى ءتيىس.
ودان ءارى، اكتيۆتەر مەن مىندەتتەمەلەر تۋرالى دەكلاراسيانى (250.00 سەن) تاپسىرعاننان كەيىن، وسى ساناتتاعى تۇلعالار 2022 جىلدىڭ 1 قاڭتارىنان باستاپ جىل سايىن كىرىستەرى مەن مۇلىكتەرى تۋرالى دەكلاراسيا (270.00 سەن) تاپسىرۋى قاجەت بولادى.
پىكىر قالدىرۋ