پرەزيدەنت جوعارعى سوت ءتوراعاسى جاقىپ اسانوۆتى قابىلدادى. بۇل تۋرالى akorda.kz سايتى حابارلادى.
مەملەكەت باسشىسىنا الداعى سوت رەفورماسىنىڭ نەگىزگى باعىتتارى، اكىمشىلىك ادىلەت مەحانيزمىن ەنگىزۋگە دايىندىق جۇمىستارى، سونداي-اق، سوت وندىرىسىندە قولدانىلاتىن ءىت ازىرلەمەلەر جايىندا باياندالدى.
جاقىپ اسانوۆ سوت جۇيەسىن 2021 جىلدىڭ شىلدە ايىنان باستاپ كۇشىنە ەنەتىن جاڭا اكىمشىلىك راسىمدىك-پروسەستىك كودەكسىنە دايىنداۋ بارىسى تۋرالى ايتتى.
قاسىم-جومارت توقايەۆ ءاربىر سوت زاڭ ۇستەمدىگىن قامتاماسىز ەتۋدەگى ءوزىنىڭ ءرولىن تەرەڭ ءتۇسىنۋى كەرەك ەكەنىنە باسا ءمان بەردى. مەملەكەت باسشىسىنىڭ پىكىرىنشە، بۇل ازاماتتاردىڭ قۇقىعى مەن ەركىندىگىن قورعاۋ، قولايلى ينۆەستيسيالىق كليمات قالىپتاستىرۋ، كاسىپكەرلىكتى جانە تۇتاس ەكونوميكانى دامىتۋ بويىنشا ماڭىزدى مىندەت.
قازاقستان پرەزيدەنتى سوتتاردىڭ كاسىبيلىگى مەن ادالدىعى ەڭ باستى قۇندىلىق بولۋى كەرەك ەكەنىن اتاپ ءوتتى. سەبەبى الداعى ۋاقىتتا ىسكە اساتىن رەفورمانىڭ تابىستى بولۋى وسىعان تىكەلەي بايلانىستى.
پىكىر قالدىرۋ