ەلباسى نۇرسۇلتان نازاربايەۆ "Nur Otan" پارتياسىنىڭ رەسپۋبليكالىق سايلاۋالدى شتابىنا باردى. بۇل تۋرالى elbasy.kz سايتى حابارلادى. 

ساعات 00:00-دە exit poll ناتيجەلەرى باياندالعان جاڭالىقتار شىعارىلىمى قارالدى. ەxit poll قورىتىندىسىنا سايكەس "Nur Otan" پارتياسى سايلاۋشىلاردىڭ 71،97 پايىز داۋىسىن جيناعان.

– بارشاڭىزدى "Nur Otan" پارتياسىنىڭ ايقىن جەڭىسىمەن قۇتتىقتايمىن. ەكزيت پولدىڭ الدىن الا ناتيجەلەرى قازاقستاندىقتار ەلىمىزدىڭ ءارى قاراي دامۋىن ءبىزدىڭ پارتيامىزبەن بايلانىستىراتىنىن كورسەتتى. سايلاۋدىڭ ەل تاۋەلسىزدىگىنىڭ وتىز جىلدىعىمەن تۇسپا-تۇس كەلۋىنىڭ سيمۆولدىق ءمانى بار. وسى ۋاقىتتا وراسان زور جۇمىس اتقارىلدى. ەڭ باستىسى ­– جاڭا اۋقىمدى ماقساتتارعا قول جەتكىزۋ ءۇشىن بەرىك نەگىز قالاندى.

الەمدە كوروناۆيرۋس ىندەتىنە شالدىققاندار سانى ارتۋدا. دۇنيەجۇزىلىك بانك الەمدىك ەكونوميكانىڭ قۇلدىراۋى مەن جۇمىسسىزدىق وسەدى دەپ بولجاپ وتىر. بۇل جاعدايدا ءبىرتۇتاس ساياسي كۇشتىڭ اينالاسىنا توپتاسقان قوعام عانا جەڭىسكە جەتەدى، ­– دەدى ەلباسى.

نۇرسۇلتان نازاربايەۆ بۇگىنگى جەتىستىك جۇمىلا اتقارىلعان جۇمىس پەن پارتيانىڭ ءاربىر مۇشەسىنىڭ ەسەلى ەڭبەگىنىڭ ناتيجەسى ەكەنىن اتاپ ءوتتى.

– بارشاڭىزعا اتقارىلعان جۇمىس ءۇشىن ريزاشىلىعىمدى بىلدىرەمىن جانە تەك جاقسىلىق تىلەيمىن. ناۋقان ءتيىمدى ءارى ناتيجەلى ءوتتى. پارتيا قاتارى جاڭاردى. حالىق اراسىندا بەدەلى بيىك جاڭا كوشباسشىلارىمىز بار. ءار اۋداننىڭ، قالانىڭ، وبلىستىڭ دامۋى ءۇشىن حالىقتىق باعدارلامالار ازىرلەندى. "Nur Otan" پارتياسىنىڭ باستى ماقساتى – حالىقتىڭ تۇرمىسىن جاقسارتۋ جانە ەلدىگىمىزدى نىعايتا بەرۋ. ەل بولىپ بىرىگە بىلسەك، الىنبايتىن اسۋ جوق. باسىمىزعا تۇسكەن قيىندىقتاردى ءبىز ءاردايىم بىرگە ەڭسەرىپ، جەتىستىكتەرگە بىرلەسە جەتەمىز. بارشاڭىزدى پارتيامىزدىڭ بۇگىنگى جەڭىسىمەن قۇتتىقتايمىن، – دەدى پارتيا ءتوراعاسى.

ەلباسى "Nur Otan" پارتياسىنىڭ سايلاۋالدى باعدارلاماسى بەس ينستيتۋسيونالدىق رەفورمانىڭ، سونىڭ ىشىندە مەملەكەت باسشىسىنىڭ حالىققا جولداۋىندا بەرگەن تاپسىرمالارىنىڭ جالعاسى ەكەنىن ايتتى.