قازنەت قولدانۋشىلارى "كوروناۆيرۋس" ءسوزىنىڭ ماعىناسى تۋرالى تەوريانى تالقىلاۋدا. ەگەر ونى لاتىن ارىپتەرىمەن وڭنان سولعا قاراي جازىپ، ۇشكە بولسە، شىققان ءسوز حيندي تىلىنەن "شىعىس جانە كوز" نەمەسە "كۇن مەن كوز" دەپ اۋدارىلادى. كەيبىر قاستاندىق تەوريالارىن جاقتاۋشىلاردىڭ پىكىرىنشە، بۇل الەمدىك قاستاندىق تەورياسىن جانە Sars-CoV-2 ۆيرۋسىنىڭ قولدان جاسالعانىن دالەلدەيدى. شىن مانىندە، بۇل ولاي ەمەس، دەپ حابارلادى Stopfake.

سايت مالىمەتىنشە "كۇن مەن كوز" تىركەسىن "كورەگەن كوز" ماسون سيمۆولىنىڭ سيپاتتاماسى رەتىندە تۇسىندىرۋگە بولاتىنىنا قاراماستان، ونىڭ قۇپيا قوعامعا ەشقانداي قاتىسى جوق.

بىرىنشىدەن، ماسونشىلدىق ءۇندىستاندا ەمەس، ەۋروپادا، XVI عاسىردىڭ سوڭىندا پايدا بولدى، قاۋىمداستىق مۇشەلەرى قۇپيا حابارلامالاردى حيندي تىلىندە ەمەس، ەۋروپالىق تىلدەردىڭ بىرىندە شيفرلاعان دەپ بولجاۋ قيسىندى.

ەكىنشىدەن، كەيبىر سوزدەردى وڭنان سولعا جانە سولدان وڭعا قاراي وقۋعا بولاتىنى جاڭالىق ەمەس. ولار پاليندرومدار دەپ اتالادى جانە بارلىق تىلدەردە بار. سونىمەن قاتار، ەگەر ونلاين-اۋدارماشى جولىنا كەز كەلگەن ءسوزدى كەرى جازساڭىز، قالىپتاسقان ارىپتەر جيىنتىعىنىڭ، الەم تىلدەرىنىڭ، كەم دەگەندە، بىرىندە ماعىناسى مەن اۋدارماسى بولۋى مۇمكىن. مىسالى، ورىسشا "سۋپ" ءسوزى، كەرى جازعاندا، رۋمىن تىلىنەن اۋدارعاندا "قويۋ" دەگەندى بىلدىرەدى، ال كەرى جازىلعان "ساحار" ءسوزى ەستون تىلىندەگى "اقشاعا" سايكەس كەلەدى. مۇنىڭ ءبارى جاي سايكەستىك قانا.

ۇشىنشىدەن، "كوروناۆيرۋس" تۋىندى ءسوز جانە ەكى بولىكتەن تۇرادى – "كورونا" جانە "ۆيرۋس". "ۆيرۋس" ءسوزى العاش رەت 1728 جىلى قولدانىسقا ەنگىزىلدى. لاتىن تىلىنەن اۋدارعاندا ۆيرۋس – "ۋلانۋ" دەگەن ماعىنانى بەرەدى. "كورونا" ءسوزى ۆيرۋستىڭ اينالاسىنداعى تاجگە ۇقساس تىكەنەكتەرگە بايلانىستى قوسىلدى. ايتا كەتەيىك، العاشقى كوروناۆيرۋس 1931 جىلى انىقتالىپ، وسىلاي اتالدى. تابىلعان شتامم تاۋىقتاردا تىنىس الۋ جولدارى اۋرۋىن تۋدىردى. بۇل قازىرگى COVID-19 پاندەمياسىمەن، ماسونداردىڭ قاستاندىق تەورياسىمەن جانە الەمدىك ۇكىمەتپەن بايلانىستى ەمەس.

تورتىنشىدەن، SARS-CoV-2 كوروناۆيرۋسىنىڭ قولدان جاسالعاندىعى تۋرالى تەوريالار بىرنەشە رەت تەرىسكە شىعارىلعان بولاتىن. بۇل شتامم وقشاۋلانعان جانە انىقتالعان، ونىڭ گەنومى جالپىعا قولجەتىمدى. عالىمدار ونىڭ تابيعي شىعۋ تەگىمەن كەلىسەدى، ونى شتامم مۋتاسياسىنان بايقاۋعا بولادى.

قورىتا ايتقاندا، وڭنان سولعا جازىلعان "كوروناۆيرۋس" ءسوزى اۋدارماسىنىڭ ماسوندىق قاستاندىق تەورياسىمەن بايلانىسى بولۋى ەكىتالاي. مۇنى سايكەستىك دەپ تە ايتۋ قيىن. ۆيرۋستىڭ قولدان جاسالعانى تۋرالى بولجامدار تولىعىمەن عىلىمعا قارسى جانە ونى ماماندار بىرنەشە رەت جوققا شىعاردى.