ۇستاز ءومىر بويى شاكىرت بويىنان جاقسى قاسيەتتەردى ىزدەيدى جانە سوعان جەتەلەيدى. سول ىسىنەن وزىنە راحات تابادى، ۇستازدىق سونىسىمەن قۇندى كاسىپ. ءبىز سونى ماقتان تۇتامىز. ۇلت رۋحانياتىن دارىپتەيتىن، ونىڭ ءقادىرىن بىلەر شاكىرت تاربيەلەۋ – بىزدەرگە پارىز. بىلىكتىلىك – ىزدەنۋمەن، ەرىنبەيتىن ۇلكەن ەڭبەكپەن كەلەتىن تاجىريبەلەردىڭ ناتيجەسى. وسىنىڭ دالەلى رەتىندە ايتارىمىز – ءال-فارابي اتىنداعى قازۇۋ-دىڭ https://www.kaznu.kz دايىندىق كافەدراسىندا دارىستەن تىس حالقىمىزدىڭ ۇلتتىق رۋحانياتىن ەسەلەۋگە، ونى ناسيحاتتاۋعا ارنالعان ءىس-شارالار ءداستۇرلى تۇردە ءوتىپ كەلەدى.
جاستاردىڭ رۋحاني دامۋىنا، ادامگەرشىلىك ىزگى قاسيەتتەردى بويىنا قالىپتاستىرۋدا بۇل شارالار وتە پايدالى، وزدەرىنىڭ بويىنداعى قابىلەتتەرىن اشۋدا، كوپشىلىك ورتادا ءوزىن جاقسى جاعىنان ۇلگى رەتىندە كورسەتە بىلۋدە،قوعامدىق شارالاردى ۇيىمداستىرا ءبىلۋ سياقتى ءار ءتۇرلى قىرىنان تانىلادى. قىزىقتى سايىستار، ءبىلىم باسەكەلەرى، ونەر فەستيۆالدارى جىل سايىنعى ءداستۇرلى مەرەكەلەرگە اينالعان.
كافەدراداعى «شامشىراق»، «جاس تاريحشى»، «تەمىرقازىق»، «ولكەتانۋ»، «جاۋقازىن»، «ءتىلتانىم»،ت.ب. ۇيىرمەلەر ماڭىزدى ءىس-شارالار اتقارۋدا. بارلىعى جاس جەتكىنشەكتەرگە تۋعان ەلدىڭ مادەنيەتىن تانىستىرۋ، حالقىمىزدىڭ قۇندى رۋحانياتىن قۇرمەتتەۋ، تانىمال تۇلعالاردىڭ ءومىرى مەن ەڭبەكتەرىن ۇلگى ەتۋ، ءعىلىم-بىلىمىن ساپالى يگەرتۋ ماقساتىندا جوسپارلى ىستەر اتقارۋدا. وتكەن جىلدان بەرى جەر الەمدى جايلاعان ىندەتتىڭ كەسىرىنەن وسى شارالاردىڭ جۇزەگە اسۋى ونلاين فورماتتا ءوتىپ جاتىر. قالاي بولسا دا، بولاشاققا دەگەن زور قۇشتارلىعى بار جاستار، ءوز تالاپتارىن جاقسى جاعىنان كورسەتۋگە تىرىسادى. بيىل دا سونداي جاستاردىڭ بارىن بايقادىق. اسىرەسە، – «شامشىراق» كلۋبىندا ويى ۇشقىر، بولاشاققا نىق سەنىمدى قىز-جىگىتتەر جينالعان. بۇل كلۋبتىڭ ماقساتى – تالانتتى جاستاردى شىعارماشىلىققا باۋلۋ، ادەبي-مادەني باعىتتاعى بىلىمدەرىن كوتەرۋ، حالقىمىزدىڭ رۋحاني قۇندىلىقتارىن ناسيحاتتاۋ.
اقىن-جازۋشىلارمەن قىزىقتى كەشتەر ۇيىمداستىرۋ، سىر-سۇحبات وتكىزۋ، جاتاقحانادا ءوزارا ءار ءتۇرلى تاقىرىپتاردا پىكىرتالاستار ۇيىمداستىرۋ شارالارى وتكىزىلەتىن ەدى. كلۋب مۇشەلەرى – ادەبيەت پەن ونەر سالاسىن تاڭداعان جاستار، ولاردىڭ قۇرامىندا بۇرىنعى تۇلەكتەر دە بار. ولار ءار ءتۇرلى وقۋ ورىندارىندا وقىپ جۇرگەن، كەيبىرى وقۋلارىن ءبىتىرىپ ەلگە قىزمەت ەتىپ ءجۇر. كەزدەسۋلەرگە كەلىپ وزدەرىنىڭ وسى جولدان قالاي وتكەنىن، بۇگىنگى جەتىستىكتەرىنە قالاي جەتكەندەرىن ءىنى-قارىنداستارىنا اقىل-كەڭەستەرىن ايتادى، شىعارماشىلىق بايلانىس ورناتادى. وسى شارالار بيىل شامالى شەكتەلىپ تۇر.
دەگەنمەن، كافەدرادا نەگىزىنەن شەتەلدەن كەلگەن قازاق بالالارى وقىعاندىقتان قوعامدىق ورتاعا بەيىمدەۋ، ءوزىن ەركىن سەزىنۋ، شىعارماشىلىق قولداۋ كورسەتۋ ءبىزدىڭ باستى نازارىمىزدا. سونداي باعىتتا بيىلعى شاكىرتتەرىمىز دە كلۋب اياسىندا اۋقىمدى ىستەر اتقارۋدا. سولاردىڭ ءبىرى - ۇلى اباي بابامىزدىڭ مەرەيتويىنا ارنالعان ءدارىس. وندا اقىننىڭ ءومىرى، شىعارمالارى تۋرالى ءبىلىپ قانا قويماي،شاكىرتتەر ابايدىڭ قارا سوزدەرىنىڭ فيلوسوفيالىق مانىنە تالداۋ جاساپ، پوەمالارىنىڭ دا ماڭىزىن ورتاعا سالدى. تىڭ دەرەكتەرمەن تانىستىرىپ، ابايدىڭ كەيىنگى جىلدارى تابىلعان قولجازبالارى تۋرالى اقپارات بەرىلدى.
سونداي-اق، كلۋب اياسىندا قازاق حالقىنىڭ ايتۋلى تۇلعالارى ا.بايتۇرسىن ۇلى، م.دۋلاتوۆ، م.جۇمابايەۆ، ش،قۇدايبەردى ۇلى سىندى قايراتكەرلەردىڭ ءومىرى مەن شىعارماشىلىعى، قوعامدىق قىزمەتتەرى تۋرالى ايتىلىپ، ونلاين-دارىستەر وتكىزىلىپ كەلەدى. شەتەلدىك قانداستارىمىز بۇل اۆتورلار تۋرالى تولىق بىلمەيتىنى، ولاردىڭ شىعارمالارىن وقىماعاندارى بەلگىلى. وسى كلۋبتىڭ شارالارى ارقىلى، كوپتەگەن تاريحي-مادەني ماڭىزدى ماسەلەلەردى ءبىلىپ، وزدەرىنە بولاشاقتا قاجەت ءبىلىم رەتىندە سانالارىنا سىڭىرگەندەرى اقيقات. ەندى بەلگىلى ازاماتتارمەن دە ونلاين-سۇحباتتار ۇيىمداستىرۋدى قولعا الماقشىمىز.
ەل رۋحانياتىن ەسەلۋدە ەلۋلى ۇلەس قوسىپ، تالانتتى شاكىرتتەردى جىل سايىن جوعارى وقۋ ورىندارىنا ۇشىرىپ وتىرعان ۇستازدار قاۋىمى ءار ءتۇرلى مىنبەلەر مەن قوعامنىڭ ءار سالالارىندا ءوز شاكىرتتەرىن كورىپ قۋانىپ جاتامىز.
جوو دەيىنگى دايىندىق كافەدراسىنىڭ اعا وقىتۋشىلارى: ج.س.ءادىلحانوۆا،
گ.م. مۋجيگوۆا
پىكىر قالدىرۋ