شەلەكتەن كەلە جاتقاندا، جولدان سەرىك بولسىنشى دەپ ءبىر ايەلدى الا سالدىم. شەشەسىنىڭ ۇيىنە بارىپ، قالاداعى پاتەرىنە تۇندەلەتىپ قايتىپ بارا جاتقان ورىس كەلىنشەك ەكەن. جول بويى انانى ءبىر، مىنانى ءبىر ايتىپ وتىردىق تا، ءبىر كەزدە اڭگىمە بالاباقشاعا اۋىستى. قالاداعى ءبىر ساديككە بالاسىن ارەڭ دەگەندە كىرگىزىپتى. سونى شەشىپ، ارقاسىنان ءبىر جۇك تۇسكەندەي بولعانىن ايتتى. ءوزى الەۋمەتتىك جەلىدە وتىرادى ەكەن. اراسىندا سوتكاسىن شۇقىلاپ، بىرەۋلەرگە لايك باسىپ وتىرعانىنان بايقاپ قالدىم. اڭگىمە اراسىندا مەملەكەتتىك ءتىل تۋرالى كوزقاراسىن، بالاباقشانى مەملەكەتتىك تىلگە اۋىستىرۋعا قالاي قارايتىنىن سىر تارتقانداي قىلىپ سۇرادىم.
«بالاباقشانى تۇگەل مەملەكەتتىك تىلگە اۋىستىرۋعا ەشكىم قارسى ەمەس. ساديكتىڭ بارلىعىن تەگىن قىلىپ، مەملەكەتتىك تىلگە كوشىرسە، ورىستاردىڭ ءبارى بالاسىن قازاق بالاباقشاسىنا اپارىپ بەرەتىن ەدى. قالاداعى قازاق ساديكتەرىنە بەرگىمىز كەلەدى. ءوزىڭىز بىلەسىز عوي، ولار اقشا سۇرايدى. ودان قالسا «ءوز ساديگىڭە بار» دەپ شىعارىپ سالادى. سودان ورىس ساديگىن ىزدەپ جۇرگەنىڭ، ساندالىپ. ءبارىن مەملەكەتتىك تىلگە كوشىرىپ، تەگىن قىلىپ قويسا عوي، شىركىن، كىم قارسى بولادى وعان؟!»،- دەدى، الگى جەردە اشىنعانداي بولىپ.
بيلىك وسى مەملەكەتتىك ءتىلدىڭ جايىن، بالاباقشانى قازاقشاعا اۋىستىرۋ ماسەلەسىن ءالى ساعىزشا سوزىپ كەلە جاتقانى شىندىق. وعان ەشكىم قارسى شىقپايدى. ازداپ ساياسي جىگەر كەرەك وعان، بولدى. حالىقتىڭ كوڭىلىنە قاراپ وتىرماعانى بەلگىلى نارسە عوي. وتىز جىل بويى كۇندە كەيىنگە شەگەرىپ كەلە جاتقان وسى تۇيىتكىلدى شەشۋگە سول بيلىكتەگىلەردىڭ ءوزىنىڭ قۇلقى بولماي وتىرعان سياقتى. ايتپەسە، بىت-شىت بولىپ، حالىقتى تەككە قىرقىستىرىپ قويعان مەملەكەتتىك ءتىل ماسەلەسىن، ۇلتتىق يدەولوگيا ماسەلەسىن باياعىدا-اق ءبىر جاعىنا شىعارىپ، شەشىپ تاستايتىن ۋاقىت بولدى عوي!
جولىمبەك ماكىش
Facebook پاراقشاسىنان
پىكىر قالدىرۋ