تانىس جىگىت حابارلاستى. ءبىر اتانىڭ ۇرپاعى قور اشىپتى. سوعان بانكتەن شوت اشساق دەپ، ءجونىن بىلمەكشى. ول قور نە ىستەيدى؟ الگى اتا ۇرپاقتارى اي سايىن اقشا جينايدى. سوعان اس، كوكپار، بايگە بەرەدى. ءتۇرىن بىلمەيتىن اتالارىنا ەسكەرتكىش ورناتادى. كوبىرەك جيىلسا مەشىت سالماقشى. ءارۋاق ريزا بولادى، ۇرپاقتار ءبىر-بىرىن تانىپ جۇرەدى، دەيدى. قىرتقان اڭگىمە.

وتكەندى ەسكە الۋ دەگەن اتپەن، اقشانى اۋاعا شاشۋ. اتاعا اركىم ۇيىندە قۇران باعىشتاي الادى.

ەرلىك، باتىرلىعىن اركىم بالا-شاعاسىنا داستارحان باسىندا ايتا الادى.

تۋىسىن بىلاي دا توي-جيىندا تانىستىرا الادى. اتاسىنىڭ اتىنان قور قۇرسىن. اقشا جيسىن. ءبىراق ول بولاشاققا قىزمەت ەتسىن. سول اتا ۇرپاقتارىنىڭ ونەر، ءبىلىم، سپورتتاعى جاستارىن قولداۋعا جۇمسالسىن. جاستار اراسىندا كونكۋرس ۇيىمداستىرىپ بيزنەستەرىن باستاۋعا بەرسىن. اتاسىنىڭ اتىنداعى شاكىرتاقى تاعايىنداسىن. ايىنا ءبىر رەت جينالىپ، مىقتى ترەنەرلەردى جيناپ، ءدارىس تىڭداسىن. مىقتى جاستاردى شەتەلگە كۋرسقا جىبەرسىن. اۋىلى تۋرالى دەرەكتى فيلم، سەريال ءتۇسىرسىن، فوتوالبوم شىعارسىن، سايت اشسىن. سول اتانىڭ دەنساۋلىعى ناشار ۇرپاعىن ەمدەتسىن. ءتىپتى اقشا كوپ جينالسا ءبىر ۇرپاق ەمەس قازاقتىڭ بولاشاعىنا اسەر ەتەتىن جوبالاردى قولداسىن. اتالارىنىڭ شاپاعاتى تيگەنى، جاقسى اتى جالعاسقانى سول ەمەس پە؟ توپ بولىپ اس ءىشىپ، ەسكەرتكىش قويۋدىڭ كىمگە پايداسى بار؟

الگى جىگىت ويلاندى، ءبىراق ۇلكەندەر كونبەيدى، اس بەرىپ، ەسكەرتكىش قويامىز، دەيدى. ساي-سايدا ەسكەرتكىش ورناتىپ، اس بەرىپ دالاقتاپ، اقشا شاشىپ جۇرگەن بىزدەن يلون ماسكتەر ءقازىر شىعا قويمايدى-اۋ.