قازاق عالامتورى نەگە باسەكەگە قابىلەتسىز؟ قازاق جۋرناليستەرى نەگە اقپاراتتى تەز ءارى ناقتى بەرە المايدى؟ الاي ىستەۋ كەرەك ەدى، بۇلاي ىستەۋ كەرەك ەدى… بۇل سوزدەر ءقازىر ەكىنىڭ ءبىرى ايتاتىن «دوپ-دومالاق» سىنعا اينالدى. نارىق زامانىندا ءار شارۋانىڭ اينالىپ كەلىپ قارجىعا تىرەلەتىنىن بىلسەدە بىلمەسكە سالادى كەيبىرەۋلەر. باسقاسى باسقا، ۇلتقا جۇمىس جاسايمىن دەپ، قازاقتىڭ تۋىن كوتەرگەن باسپاسوزگە ءدال ءقازىر بۋمالاپ اقشا بەرەتىن بيلىك تە، اقسۇيەك تە جوق. شۇكىرلىگى، بۇىگىنگى جاس قازاقتار قۇر تۇلپقا قاراپ موڭىرەپ تۇرمايدى. قولىنان نە كەلەدى، سونى جاسايدى جانە مىندەتسىمەيدى. «قامشى» پورتالى دا ءبىسىمىللاسىن سايگۇلىك شابىسپەن باستاپ، ءبىر جىلدان بەرى وگىز اياڭعا تۇسكەن. ايتەۋىر، باعىتى انىق، ماقساتى بەرىك (http://qamshy.kz/؟page_id=29). «اباي.كز»ء-تىڭ ارتىنان ەرىپ، «ماسا.كز»-پەن قول ۇستاسىپ كەلە جاتىر… مىنە، ساناۋلى كۇندەردەن بەرى قازاق كوشىنە توقتاۋ سالىندى. «كوشتەن قالمايىق، كوشتى توقتاتپايىق!» دەگەن ۇرانىمىزدى ەستىر قۇلاق بولمادى. بىرەۋى شاي، بىرەۋى نان اكەلىپ، ءبىر داستارحاننىڭ باسىنان تابىلاتىن قازاقى ادەتىمىزگە سالىپ، «قامشىنى» قايتا قولعا الدىق. ماقسات بىرەۋ – الەمدەگى بار قازاقتىڭ پىكىرىن ءبىر ارناعا توعىستىرىپ، التى الاشتىڭ جوعىن جوقتاپ، مۇڭىن مۇڭداۋ. ءۇش قارىپتە ۇكىلەپ وتىرۋىمىزدىڭ دا سىرى سوندا. ءبىر جارىم ميلليون قانداسىمىز قولداناتىن توتە جازۋ دا ءبىزدىڭ سايتتا تۇر. ونى تەحنيكاسىنىڭ قيىندىعىنا قاراماستان، قىتايدا تۇراتىن قانداسىمىز جانىبەك شەريازدان ۇلى ورىمگە قوستى. ەڭ ۇلكەن جاڭالىعىمىز سول – «قامشىگەر» حابارىن اشتىق. ءبىرىنشى سۇحباتىمىزدى اتى اڭىزعا اينالعان قاجىعۇمار شابدان ۇلىنىڭ تۇياعىنان (http://abai.kz/node/16962) باستادىق. تاريحىن قازىپ، تانىتۋعا ءتيىس، ءبىلىمىن باعالاپ، ۇسىنۋعا ءتيىس، ايتارى بار ازاماتتاردى ءبىز قاي-قاشاندا قۇشاق جايىپ قارسى الىپ، قولىنا قامشى ۇستاتۋعا دايىنبىز. شاعىن عانا «العى سوزىمىزدە» سايتتىڭ قايتا تۇلەۋىنە مۇرىندىق بولعان ازاماتتاردى ءتىزىپ شىعۋ مۇمكىن ەمەس. اللا قالاسا قازاقتىڭ ءتول جاڭا جىلى ناۋىرىزدا “جەزبۇيدا” جاستار ۇيىمىمەن بىرلەسىپ، “قامشىعا” باستان-اياق قولداۋ كورسەتكەن ازاماتتاردىڭ اتىن اتىپ، ءتۇسىن تۇستەپ، نۇرىن تاسىتۋ ويىمىزدا بار. الباستى قاباققا قاراي باساتىن مىناۋ زاماندا ءار قازاقتىڭ قولىندا «قامشىسى» بولسىن دەپ تىلەيىك! ويتكەنى ول ۇل بولساڭ قولىڭدا وينايدى، قۇل بولساڭ توبەڭدە وينايدى!