اقتوبە وبلىسىنىڭ اكىمى وڭداسىن ورازالين اقتوبەلىك اقىن-جازۋشىلارمەن - جازۋشىلار وداعىنىڭ مۇشەلەرىمەن كەزدەستى.
«سىزدەرمەن كەزدەسىپ تۇرۋ داستۇرگە اينالعانىنا قۋانىشتىمىن. سونىڭ ارقاسىندا رۋحاني-ادامگەرشىلىك مادەنيەتتىڭ دامۋىنا قاتىستى وزەكتى سۇراقتار تالقىلانىپ، شەشىلۋدە، وسى باعىتتا كوپتەگەن جوبالار جۇزەگە اسىرىلدى»،- دەدى ءوڭىر باسشىسى سالەمدەسۋ سوزىندە.
سوڭعى جىلدارى ءوڭىر مادەنيەتىنە ەرەكشە نازار اۋدارىلۋدا. ماسەلەن، ەكى جىل قاتارىنان اقتوبە وبلىسىندا رەسپۋبليكالىق ادەبي فورۋم وتكىزىلىپ كەلەدى، سونداي-اق، جەتى اتاۋلى ستيپەندياعا قوسىمشا 1 ملن تەڭگە كولەمىندە وتەجان نۇرعالييەۆ، باكىر تاجىبايەۆ جانە قاجىعالي مۇحامبەتقالييەۆ ەسىمدى جازۋشىلار اتىنداعى تاعى ءۇش ستيپەنديانى تاعايىنداۋ جوسپارلانىپ وتىر. بۇدان وزگە، اقتوبە ءوڭىرىنىڭ فولكلورلىق مۋزىكاسىنىڭ انتولوگياسى شىقتى، كىتاپحانالاردىڭ ماتەريالدىق-تەحنيكالىق بازالارىن نىعايتۋ، ولاردىڭ قورىن مولايتۋ، جاس جازۋشىلاردىڭ كىتاپتارىن شىعارۋ جۇمىستارى جۇرگىزىلۋدە.
«بىلتىر قالامىزدىڭ ورتالىعىندا ۇلى ويشىل، اقىن اباي قۇنانبايەۆقا ەسكەرتكىش تۇرعىزىلعان بولاتىن، جىل سوڭىنا دەيىن اقىن تولەگەن ايبەرگەنوۆكە، كومپوزيتور ءشامشى قالداياقوۆقا ەسكەرتكىشتەر ورناتىلادى، سونىمەن قاتار، الاش قايراتكەرلەرىنە ارنالعان «تاۋەلسىزدىك اق تاڭى» مەموريالدىق كەشەنى اشىلدى.
كەزدەسۋگە بارلىعى 16 ادام شاقىرىلدى. وڭداسىن ورازالين ولارعا العىس حاتتار مەن 160 مىڭ تەڭگە كولەمىندە اقشالاي سىياقى تابىس ەتتى.
بۇدان بولەك، اقىن، «ادىرنا» ادەبي جۋرنالىنىڭ رەداكتورى مەيىرحان اقداۋلەتكە 70 جاسقا تولۋىنا وراي قۇتتىقتاۋ قاعازى بەرىلدى.