بولشەك ساۋدا كولەمى ۇلعايدى
تامىزدا ەلىمىزدەگى بولشەك ساۋدا كولەمى 549 ملرد تەڭگەگە جەتتى. بۇل بىلتىرعى وسى مەرزىممەن سالىستىرعاندا، 4،3 پايىزعا ارتىق. مۇنداي اقپاراتتى Ranking.kz مونيتورينگ اگەنتتىگى جاريا ەتتى.
الايدا جىلدىق ءوسىم بۇرىنعىدان باسەڭدەپ كەلەدى. وتكەن 5 جىلدا بولشەك ساۋدا ورتا ەسەپپەن جىلىنا 22 پايىزعا ارتقان. ەلىمىزدىڭ 13 ايماعىندا ءوسۋ بار، سونىڭ ىشىندە اتىراۋ وبلىسىنداعى بولشەك ساۋدا 9،1 پايىزعا (14،7 ملرد تەڭگە) ارتسا، قىزىلوردا وبلىسى 8،4 پايىزعا (16،5 ملرد تەڭگە) الدا كەلەدى. ال استاناداعى بولشەك ساۋداداعى تاۋار اينالىمى 3،7 پايىزعا ارتقان. وسىلايشا قالاداعى بارلىق وتكىزۋ ارنالارى بويىنشا بولشەك ساۋدا كولەمى 413791،7 ملن تەڭگەنى قۇرادى. الايدا، قالاداعى ساۋدا اينالىمى 4،1 پايىزعا تومەندەپتى. بيىلعى قاڭتار – تامىز ارالىعىنداعى بازارلارمەن جانە جەكە كاسىپكەرلەرمەن جاسالعان ساۋدا اينالىمى 119124،1 ملن تەڭگەنى قۇراعان. ال رەسمي كاسىپورىندارداعى بولشەك ساۋدا كولەمى 294667،6 ملن تەڭگەنى كورسەتىپ وتىر. بۇل بيىلعى جىلمەن سالىستىرعاندا، 7،2 پايىزعا جوعارى.
ستاتيستيكا كوميتەتىنىڭ ءمالىمەتتەرى دە وسىعان سايادى. بيىلعى قاڭتار – تامىزدا بولشەك ساۋدا كولەمى وتكەن جىلعى كەزەڭمەن سالىستىرعاندا، 2،8 پايىزعا جوعارىلاعان. ستاتيستيكا كوميتەتى ساۋدا كاسىپورىندارى ارقىلى تاۋارلاردى وتكىزۋ كولەمى 2 052،8 ملرد تەڭگەنى قۇراعانىن حابارلادى. ال بازارلارمەن جانە جەكە كاسىپكەرلەرمەن ساۋدا كولەمى 6،6 پايىزعا كوبەيگەن.
بولشەك ساۋدادا نەگىزىنەن، ازىق-تۇلىك ەمەس تاۋارلار باسىم بولىپ تۇر. مۇنداي تاۋارلاردىڭ بولشەك ساۋداداعى جالپى كولەمى 64،6 پايىزعا تەڭەلدى. ال ءازىق-تۇلىك تاۋارلارى 2،3 پايىزعا ۇلعايدى.
ال كوتەرمە ساۋدا كەرىسىنشە، ەكى ايدان بەرىپ تومەندەپ جاتىر. بىلتىرعى جىلمەن سالىستىرعاندا، بيىلعى شىلدە، تامىز ايلارىندا كوتەرمە ساۋدا كەمىپ كەتتى. ءبىر عانا تامىز ايىندا كوتەرمە ساۋدا كولەمى 8،9 پايىزعا تومەندەدى. كوتەرمە ساۋداداعى جىلدىق ءوسىم دە كوڭىل كونشىتپەيدى، وسىمەن ەكى جىل قاتارىنان دەڭگەيى ءتۇسىپ جاتىر. جىلدىق ءوسىم بويىنشا كوتەرمە ساۋداداعى كولەمى ارتقان ءبىر عانا ايماق بار، ول استانا. استاناداعى كوتەرمە ساۋدا كولەمى 7،9 پايىزعا جوعارىلاپتى. قاڭتار – تامىزدا 1790،4 ملن تەڭگەگە ساۋدا جاسالعان. كوبىنە، تۇتىنۋ تاۋارلارى مەن وندىرىستىك-تەحنيكالىق باعىتتاعى ونىمدەر ساتىلعانى ءمالىم بولدى. باس قالاداعى قوعامدىق تاماقتاندىرۋ قىزمەتى دە 7،6 پايىزعا جوعارىلادى. وسىلايشا 2013،2 ملن تەڭگە كولەمىندەگى تاماقتاندىرۋ قىزمەتى كورسەتىلگەن. ال اۆتوموبيلدەرگە، موتوسيكلدەرگە تەحنيكالىق قىزمەت كورسەتۋ، سونداي-اق ولاردى جوندەۋ قىزمەتى 3502 ملن تەڭگەنى قۇراپ، بىلتىرعى جىلعا قاراعاندا 2،2 پايىزعا جوعارىلاعان. ەلوردادا جىلدىق ءوسىم 6،1 پايىزعا جوعارىلاپ، 237،4 ملرد تەڭگە كورسەتكىشكە يە بولدى.
جالپى العاندا، ەلىمىزدەگى بولشەك جانە كوتەرمە ساۋدا سالاسىنداعى بانكتىك دەپوزيت قورجىنىنىڭ دا قاۋقارى ءماز ەمەس. ءبىر جىلدا 9 پايىزعا تومەندەپ، 2،12 ترلن تەڭگەگە جەتكەن. بۇل كورسەتكىش جىل باسىنان بەرى وسىلاي كەلە جاتىر. سوڭعى رەت بۇل سالاداعى ايلىق ءوسىم بيىلعى قاڭتاردا تىركەلدى. ول كەزدە ءوسىم كولەمى 0،6 پايىزعا ۇلعايىپ، 2،34 ترلن تەڭگەگە جەتكەن بولاتىن. بولشەك جانە كوتەرمە ساۋداداعى نەگىزگى كاپيتالدى ينۆەستيسيالاۋ دا ازايىپ كەلەدى. مۇنداعى جىلدىق ءوسىم بىلتىر 11 پايىزعا (2013 جىلعى وسى مەرزىممەن سالىستىرعاندا) ارتىق ەدى، ال بيىل بىلتىرعىمەن سالىستىرعاندا، 0،6 پايىزعا تومەندەپ وتىر.
