اقمولا وبلىسىنىڭ ەرەيمەنتاۋ اۋدانىندا پسيحولوگيالىق-پەداگوگيكالىق تۇزەتۋ كابينەتىندە 910 بالا وڭالتۋدان ءوتتى. بۇل تۋرالى «نۇر وتان» پارتياسىنىڭ وبلىستىق فيليالىنىڭ باسپا ءسوز قىزمەتىنەن حابارلادى. بۇل تۋرالى قامشى پورتالى inform.kz-كە سىلتەمە جاساي وتىرىپ حابارلايدى.

«كەدەرگىسىز كەلەشەك» جانە «باقىتتى بالالىق» جوبالارى شەڭبەرىندە پارتيانىڭ ەرەيمەنتاۋ اۋداندىق فيليالى پسيحولوگيالىق-پەداگوگيكالىق تۇزەتۋ كابينەتىندە مۇمكىندىگى شەكتەۋلى بالالارمەن كەزدەسۋ ۇيىمداستىردى.

كابينەت مەڭگەرۋشىسى «نۇر وتان» پارتياسىنىڭ مۇشەسى ايگۇل حاسەنوۆانىڭ ايتۋىنشا، اۋداندا مۇمكىندىگى شەكتەۋلى بالالاردىڭ تالىم-تاربيە الۋى ءۇشىن بارلىق جاعداي جاسالىنعان. 

«بالالار ءۇشىن ءتۇرلى قىزىقتى ءارى تارتىمدى ءىس-شارالار وتكىزىپ تۇرامىز. تاربيەلەنۋشىلەرىمىز وبلىستىق بايقاۋلارعا قاتىسىپ، ءاردايىم جۇلدەلى ورىنداردان كورىنۋدە»، - دەيدى ايگۇل حاسەنوۆا.

قازىرگى تاڭدا بۇلدىرشىندەر قازان ايىنىڭ سوڭىندا كوكشەتاۋدا وتەتىن مۇمكىندىگى شەكتەۋلى بالالارعا ارنالعان «جۇلدىزاي» بايقاۋىنا دايىندىق ۇستىندە.

جىل باسىنان بەرى لوگوپەد، پسيحولوگ، ەمدەۋ-فيزيكالىق تاربيە جونىندەگى نۇسقاۋشى، الەۋمەتتىك وقىتۋشى ماماندارىمەن 50-دەن استام بالالارعا كومەك كورسەتىلدى.

ەسكە سالا كەتسەك، اتالعان «پسيحولوگيالىق-پەداگوگيكالىق تۇزەتۋ كابينەتى» كمم وسىندان 11 جىل بۇرىن جەرگىلىكتى مەكتەپ-ينتەرناتى نەگىزىندە اشىلعان بولاتىن. سودان بەرى مۇندا 910 بالا وڭالتۋدان ءوتتى. 2013 جىلى مەكەمەگە جەكە عيمارات بولىنگەن بولاتىن.