اقش پرەزيدەنتى دجو بايدەن نيۋ-يوركتە دەموكراتيالىق پارتيانىڭ جيىنىندا رەسەي پرەزيدەنتى ۆلاديمير پۋتين "تاكتيكالىق يادرولىق نەمەسە حيميالىق، بيولوگيالىق قارۋ قولدانۋ تۋرالى ايتقاندا قالجىڭدامادى" دەپ تۇجىرىمدايتىنداي ونى جەتكىلىكتى دارەجەدە بىلەتىنىن ايتتى.

1962 جىلعى كۋبا داعدارىسى كەزىندە اقش پرەزيدەنتى دجون كەننەدي مەن كەڭەس وداعىنىڭ ءبىرىنشى حاتشىسى نيكيتا حرۋششيەۆ كۋباعا كەڭەستىك زىمىرانداردىڭ ورنالاستىرىلۋىنا بايلانىستى يادرولىق قارۋ قولدانۋعا شاق قالعان.

بۇگىن 70 جاسقا كەلىپ جاتقان پۋتين 21 قىركۇيەك كۇنى ءىشىنارا موبيليزاسيا تۋرالى مالىمدەمەسىندە رەسەيدىڭ اۋماقتىق تۇتاستىعىن قورعاۋ ءۇشىن يادرولىق قارۋعا جۇگىنۋگە دەيىن بارۋعا ءازىر ەكەنىن ايتقان. 5 قازاندا پۋتين ۋكراينانىڭ ءىشىنارا باسىپ الىنعان 4 ايماعىن رەسەيگە قوسۋ تۋرالى كونستيتۋسيالىق زاڭعا قول قويعان.

لۋگانسك، دونەسك، حەرسون، زاپاروجە وبلىستارىنىڭ رەسەي اننەكسيالاعان اۋماعى ۋكراين جەرىنىڭ 15 پايىزىن قۇرايدى. رەسەي اننەكسياسىن حالىقارالىق قاۋىمداستىق مويىنداماعانىنا قاراماستان، ماسكەۋ ءۇشىن ەندى بۇل جەرلەر رەسەيگە تيەسىلى. قىركۇيەكتەن بەرى ورىس اسكەرىن شەگىندىرىپ، باسىپ الىنعان ەلدى-مەكەندەردى بىرىنەن كەيىن ءبىرىن ازات ەتىپ كەلە جاتقان ۋكراينانىڭ قارىمتا شابۋىلىن رەسەي باسقىنشىلىق دەپ باعالاپ، وسى تۇستا يادرولىق قارۋ قولدانۋعا سىلتاۋ تابۋى ىقتيمال ەكەنىن ساراپشىلار ايتىپ ءجۇر.