تۇركىستان وبلىسىندا 174 اۋىل اكىمى اكىمشىلىك قۇقىق بۇزۋشىلىق تۋرالى كودەكسىنىڭ 498-بابى (ستاتيستيكانى قوسىپ جازۋ جانە بۇرمالاۋ) بويىنشا 5 ملن تەڭگە ايىپپۇل ارقالاپ، اكىمشىلىك جاۋاپتىلىققا تارتىلدى.

باس پروكۋراتۋرا مالىمەتىنشە، اكىمدەر "قولجەتىمدى جايىلىم" جوباسىنىڭ اياسىندا اۋىل ايماقتاردا ءسۇت جانە ەت ونىمدەرىن ءوندىرۋ بويىنشا كورسەتكىشتەردى جاقسارتۋ ماقساتىندا ستاتيستيكالىق ەسەپتەرگە قاساقانا شارۋا قوجالىقتارىنداعى مال باستارىن قوسىپ جازعان. 

ناتيجەسىندە بۇرمالانعان ەسەپتەردى اۋدان اكىمدەرى جايىلىمدىق جەرلەردى باسقارۋ جوباسىن ءتۇزۋ جانە بەكىتۋ بارىسىندا قولدانعان. 

قازىرگى تاڭدا اتالعان ستاتيستيكا پروكۋرورلاردىڭ ىقپالىمەن رەتكە كەلتىرىلىپ، وبلىس بويىنشا ناقتى قاجەتتىلىك 3 ەسەگە، ياعني 2،1 ملن گەكتاردان 652 مىڭ گەكتارعا دەيىن تومەندەگەن.

ودان بولەك، پروكۋرورلىق اكتىلەردىڭ نەگىزىندە قالا، اۋدان اكىمدىكتەرىمەن بۇدان الدىن بەكىتىلگەن جوبالاردى قايتا قاراۋ جۇمىستارى جۇرگىزىلۋدە، دەپ حابارلادى Ulysmedia.kz

"وسى تەكتەس كەمشىلىكتەردى الدىن الۋ ماقساتىندا ستراتەگيالىق جوسپارلاۋ جانە رەفورمالار بويىنشا اگەنتتىگىنە، اۋىلشارۋاشىلىعى مينيسترلىگىنە جانە سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنە مال شارۋاشىلىعى سالاسىنداعى باعدارلامالاردى ينتەگراسيالاۋ بويىنشا ءبىرقاتار ۇسىنىستار جولداندى"، – دەلىنگەن حابارلامادا.