ساراپشى، قوعام بەلسەندىسى قازبەك بەيسەبايەۆقا الماتىداعى "جىبەك جولى" ستانساسىنىڭ الدىندا ءبىر جىگىت جاقىنداپ كەلىپ، سۇراعان ەكەن:
– كەشىرەسىز، نازاربايەۆ كوشەسى قاي جاقتا؟
"ونىڭ اتىن اتاماشى"، – دەدىم دە، انا جاقتا دەپ كورسەتتىم، دەيدى پوست اۆتورى.
جىگىت ءبىراز ساسىپ قالدى دا، سوسىن قولىنداعى تەلەفونىن كورسەتىپ: "رەنجىمەڭىز اعا، سولاي جازىلىپ تۇر"، دەپ اقتالىپتى.
"مۇندا سەنىڭ دە، مەنىڭ كىنام جوق" دەپ، مەتروعا كىرىپ كەتكەن ساراپشى "نەگىزىندە سول كوشەنىڭ اتاۋى تۋرالى سۇراقتى تاعى كوتەرۋ كەرەك"، دەگەن وي تاستاپتى.
راس-اۋ، بۇل قازاق ءۇشىن ماڭىزدى سۇراق!
- نازاربايەۆ اتىنداعى كوشەلەر قازاقستاندا تۇرا بەرە مە؟
- ەگەر تۇرا بەرسە، بۇل ەلىمىزدىڭ بار ساياساتى دا، باعىتى دا بۇرىنعى سۇرلەۋىنە قايتا تۇسەدى دەگەندى مەڭزەۋ مە؟
باس قالاعا سۇمدىق پافوسپەن بەرىلگەن نۇر-سۇلتان اتاۋىن قاڭتار وقيعاسىنان كەيىن جالما-جان الىپ تاستادى "جاڭا قازاقستان" بيلىگى. تالدىقورعاندا قۇلاعان ەسكەرتكىشتى ورنىنا قايتا ورناتپادى.
ءبىراق استانا اۋەجايىندا نازاربايەۆتىڭ ەسىمى قالدى، الماتىداعى نازاربايەۆ كوشەسىندەگى تاقتايشالاردى حالىق شاعىپ تاستاسا دا، قالا بيلىگى قالپىنا كەلتىرىپ قويدى.
قولعا العان ءىسىنىڭ ءبارىن شالا اتقارىپ، سوڭىنا دەيىن تىندىرمايتىن بيلىك بۇل جەردە دە نازاربايەۆتىڭ مۇراسىنان ارىلۋدى ادۋىنمەن باستاپ، اقىر سوڭىندا ارتقا شەگىنىپ قالدى-اۋ.
تاريحتا بولعانى راس، تۇلعا بولعانى راس، ءبىراق كەز-كەلگەن دەنى دۇرىس ۇلت ءوز تاريحىنىڭ جامانىن جاسىرىپ، جاقسىلىعىن اسىرۋعا ۇمتىلماي ما؟
قازاقستان كوشەلەرىنەن نازاربايەۆتىڭ ەسىمىن الىپ تاستاساق، توقايەۆ پەن دوسايەۆقا "قاراپايىم زەينەتكەر" نازاربايەۆ كەلىپ اكىرەڭدەمەيتىن شىعار؟
قىسقاسى، بۇل ماسەلەنى ءالى دە كوتەرۋ كەرەك. نازاربايەۆ ەسىمىنىڭ ورنىنا لايىق اتاۋ دا دايىن: بىلتىر "Oyan، Qazaqstan" قوزعالىسى الماتىداعى نازاربايەۆ داڭعىلىن قاڭتار دەپ وزگەرتۋدى تالاپ ەتىپ اكسيا وتكىزگەنى بار.
پىكىر قالدىرۋ