استانادا دەپۋتاتتار جولاۋشىلاردى اۆتوموبيلمەن تاسىمالداۋ سالاسىنداعى كەيبىر مەملەكەتتىك فۋنكسيالاردى مىندەتتى مۇشەلىككە (قاتىسۋعا) نەگىزدەلگەن ءوزىن-وزى رەتتەۋگە بەرۋگە قاتىستى تۇزەتۋلەر ۇسىنىلدى. وتىرىس نۇرتاي سابيليانوۆتىڭ توراعالىعىمەن ەكونوميكالىق رەفورما جانە وڭىرلىك دامۋ كوميتەتىندە ءوتتى. زاڭ جوباسى تۋرالى ق ر كولىك مينيسترلىگى كولىك كوميتەتىنىڭ ءتوراعاسى التاي ءالي بايانداما جاسادى.

ول اۆتوكولىك جولاۋشىلار تاسىمالى سالاسىنداعى ءتورت مەملەكەتتىك فۋنكسيانى ءوزىن-وزى رەتتەۋگە كوشىرۋ جۇمىستارى 2020 جىلدان باستاپ جۇرگىزىلىپ جاتقانىن ايتتى. وعان تۇراقتى حالىقارالىق، وبلىسارالىق جانە تۇراقتى ەمەس اۆتوبۋس تاسىمالى، سونداي-اق تاكسي قىزمەتتەرى كىرەدى. بايانداماشىنىڭ ايتۋىنشا، بۇل ۋاكىلەتتى ورگاندار ايقىندايتىن نەگىزگى دامۋ باعىتتارىنا نازار اۋدارا وتىرىپ، جوعارى ساپالى ستاندارتتار مەن ەرەجەلەردى جىلدام قابىلداۋعا مۇمكىندىك بەرەدى.

– تاسىمالداۋ پروسەسىن باقىلاۋ مەملەكەتتىك دەڭگەيدەن ءوزىن-وزى رەتتەۋدىڭ ىشكى ۇيىمداستىرۋشىلىق دەڭگەيىنە وتەدى. ول تاسىمالداۋ نارىعىنا قاتىسۋشى رەتىندە ءوزىنىڭ ءاربىر مۇشەسىنىڭ جۇمىسىن باقىلاۋعا جول اشادى. تاسىمالداۋشىلاردىڭ بىلىكتىلىگىن ۇنەمى ارتتىرىپ وتىرۋعا مۇمكىندىك بەرەدى، – دەدى التاي ءالي.

تۇتاستاي العاندا، كولىك قاۋىپسىزدىگى كۇشەيتىلىپ، بيۋروكراتيا، سىبايلاس جەمقورلىق تاۋەكەلدەرى، مەملەكەتتىك قىزمەتكەرلەرگە تۇسەتىن جۇكتەمە جانە بيۋدجەت شىعىستارى ازايادى دەپ كۇتىلۋدە. جوبا اياسىندا «كولىك»، «اۆتوكولىك»، «استانانىڭ مارتەبەسى»، «رۇقساتتار مەن حابارلامالار»، «ق ر كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭدارعا تۇزەتۋلەر ەنگىزىلمەك.  

بايانداما سوڭىندا دەپۋتاتتار بايانداماشىعا سۇراقتار قويىپ، ۇسىنىستارىن ايتتى. ءماجىلىس دەپۋتاتى تىلەكتەس ادامبەكوۆ سالاداعى وزەكتى سۇراقتاردى سيفرلىق جۇيە ارقىلى شەشۋدى، مينيسترلىكتىڭ جاۋاپكەرشىلىگىن ارتتىرۋدى ۇسىندى.  

– بىرىنشىدەن، بۇل زاڭ جوباسى ءالى شيكى. زاڭناما ارقىلى قولدارىڭىزدان كەلەتىن دۇنيەنى عانا قالدىرىپ، جاۋاپكەرشىلىكتى باسقا نارىققا بەرىپ جىبەرگىلەرىڭىز كەلەدى. ەكىنشىدەن، بۇل تۇزەتۋدەن كەيىن قانداي ناتيجە بولادى؟ مىسالى، جول اپاتى ازايا ما، جەمقورلىق جويىلا ما، تەحنيكالىق جاعداي جاقسارا ما، وسى قىزمەتتى پايدالاناتىن قاراپايىم حالىق وسىنى سەزە مە، مەن مۇنى باياندامادان دا، سلايدتان دا كورگەن جوقپىن. ۇشىنشىدەن، قالانىڭ ىشىندە ۇلكەن مارشرۋتتاردى الىپ جۇرگەن اۆتوبۋستاردىڭ تابىسى جاقسى ءجۇرىپ تۇر. ولاردىڭ تابىسى مول بولىپ، كىشى مارشرۋتتاعىلار ءوز كۇنىن كورە الماي جۇرسە، ول دا بولمايدى. وسىنىڭ ءبارىن جان-جاقتى قاراۋ قاجەت. سەبەبى بۇل ماڭىزدى، ءوزىمىز كۇندەلىكتى پايدالاناتىن زاڭ جوباسى دەپ ويلايمىن، – دەدى ت.ادامبەكوۆ.

بۇل ورايدا كوميتەت ءتوراعاسى نۇرتاي سابيليانوۆ قالاىشىلىك اۆتوبۋستارعا قاتىستى ماسەلە وزەكتى ەكەنىن ايتتى. اۆتوپاركتەرگە سۋبسيديا بەرىلگەنىمەن، ونى ەشكىم قاداعالامايتىنىن اتاپ ءوتتى. سوندىقتان سۋبسيديا بەرۋ ءتارتىبىن رەتتەيتىن زاڭعا وزگەرىس ەنگىزۋدى ۇسىندى.

– ويتكەنى سۋبسيديا اۆتوپاركتەردىڭ شىعىندارىن وتەپ جاتىر. ال نەگىزىندە ول جاڭا تەحنيكالار الۋعا جۇمسالۋى كەرەك. جوبا بويىنشا جۇمىس ەندى باستالدى. ءار ماسەلەگە بايلانىستى تالداۋ جۇرگىزىپ، تالقىلاۋ بارىسىندا ءجىتى قارايمىز. مەملەكەتتىك باقىلاۋ اۆتوتاسىمالداۋشىلار پالاتاسىنا مۇشەلىگىن راستاۋدى عانا جۇزەگە اسىرىپ، سونى عانا باقىلايدى ەكەن. ول دۇرىس ەمەس، بارلىق تاسىمالداۋشى قاداعالانۋى كەرەك. سول سەبەپتى اۆتوتاسىمالداۋشىلار پالاتاسىنا قويىلاتىن تالاپتاردى دا كۇشەيتۋ قاجەت. ولار جالپى زاڭ بويىنشا جۇمىس ىستەۋگە ءتيىس، – دەدى ن.سابيليانوۆ.

جيىنعا ماجىلىسمەندەرمەن قاتار مۇددەلى مەملەكەتتىك ورگانداردىڭ، كاسىبي قوعامداستىق پەن قوعامدىق ۇيىمداردىڭ وكىلدەرى قاتىستى. جيىندا ايتىلعان ۇسىنىستاردى ءماجىلىس دەپۋتاتى تىلەكتەس ادامبەكوۆ باستاعان جۇمىس توبى قارايدى.