مەملەكەت باسشىسى قاسىم-جومارت توقايەۆ ايتقانداي، ساياسي جاڭعىرۋسىز ەلدىڭ العا قاراي جىلجۋى مۇمكىن ەمەس. تاۋەلسىزدىك العاننان كەيىن وتكەن وتىز ءبىر جىل ەلىمىز ءۇشىن وڭايعا تۇسكەن جوق. وسى ۋاقىت اراسىندا ۇلتتىڭ قامىن ويلاپ ەلجىرەگەن ەلدى دە، ەلىم دەگەن ەردى دە كوردىك. ارىن اقشاعا ساۋدالاعاندار دا از بولعان جوق.

دامىعان 50 ەلدىڭ اراسىنان ورىن الدىق. ەندىگى كەزەكتەگى ءبىزدىڭ مىندەتىمىز – ەلىمىزدىڭ بىرلىگىن مىعىم ۇستاپ، قازاقستاننان الپاۋىت مەملەكەت جاساۋ.

«ەل بولام دەسەڭ، بەسىگىڭدى تۇزە» دەمەكشى، ەلدىڭ ەرتەڭى – بولاشاق جاس بۋىن. ال سول بۋىندى تاربيە مەن تارتىپكە باۋلىپ ءوسىرۋ – ءبىز بەن ءسىزدىڭ مىندەت. 

ەسكى جۇيەمەن قالايشا جاڭا قازاقستان قۇرماقپىز؟ «جاڭا قازاقستاندى قۇرۋ ءۇشىن بيلىكتى جاڭارتۋ كەرەك»، دەيتىندەر كوپ. 

وسى ورايدا قاسىم-جومارت توقايەۆ مەملەكەتتىك قىزمەتكەرلەردى قولىنان تۇك كەلمەيدى دەپ كەمسىتۋدى دوعارۋ كەرەك ەكەنىن ەسكە سالادى. «ءتىپتى ولاردى «حالىق جاۋى» كورەتىندەر بار. «شەنەۋنىك» دەگەن ءسوز جاعىمسىز ۇعىمعا اينالىپ بارادى. بۇل – دۇرىس ەمەس. مەملەكەتتىك قىزمەتتە ادال، ءارى بىلىكتى كادرلار وتە كوپ. ولار وتانىمىزدىڭ يگىلىگى جولىندا تىنباي ەڭبەك ەتىپ ءجۇر. ءبىراق وكىنىشكە قاراي «ءبىر قارىن مايدى ءبىر قۇمالاق شىرىتەدى» دەگەن دە بار. ونداي ادامدارمەن ءبىز بىردەن قوشتاسىپ جاتىرمىز. بولاشاقتا دا سولاي بولادى»، دەگەن بولاتىن پرەزيدەنت.

بيلىك حالىققا ادىلەتتى بولسىن، حالىق بيلىككە ادىلەتتى بولسىن! مىنە جاڭا قازاقستاننىڭ التىن ەرەجەسى وسىنداي بولۋى كەرەك. حالىق كۇندەۋدى عانا ەمەس، كۇلىمدەۋدى دە بىلسە، بيلىكتىڭ دە بارىنشا قالقىسىز قىزمەت ەتپەگى انىق.