قىرعىزستان پرەزيدەنتى سادىر جاپاروۆ "اۋەدەن شابۋىلعا قارسى قورعانۋدىڭ بىرلەسكەن ايماقتىق جۇيەسىن قۇرۋ جونىندە قىرعىزستان مەن رەسەيدىڭ اراسىنداعى كەلىسىمدى راتيفيكاسيالاۋ" بويىنشا زاڭ جوباسىنا قول قويدى.

بۇل تۋرالى پرەزيدەنت سايتىندا 12 قازاندا جاريالاندى.

"قىرعىزستان مەن رەسەي اراسىندا اۋەدەن قورعانۋدىڭ بىرلەسكەن ايماقتىق جۇيەسىن قۇرۋ ەكى ەلدىڭ اۋە كەڭىستىگىن قورعاۋعا جانە قاۋىپسىزدىگىن قامتاماسىز ەتۋگە مۇمكىندىك بەرەدى"، - دەلىنگەن مالىمەتتە.

"بۇل قۇجات اياسىندا رەسەي كانت قالاسىنىڭ ايماعىنداعى رەسەيلىك اۆياسيالىق بازانىڭ اۋدانىندا اۋەدەن شابۋىلدان قورعانۋ كومپونەنتتەرىن ورنالاستىرۋدى جوسپارلايدى. بۇل ماقساتتا قىرعىزستاننىڭ قورعانىس مينيسترلىگىنىڭ وتىنىشىنە سايكەس، كانتتاعى اۋە بازاعا قوسىمشا 5 گەكتار جەر ۋاقىتشا پايدالانۋعا بەرۋ بويىنشا ءتيىستى ىستەر جۇرگىزىلدى. اۋەدەن شابۋىلدان قورعانۋ ىستەرىن باسقارۋدى قىرعىز تاراپ جۇرگىزەدى، ال ماتەريالدىق-تەحنيكالىق جاعىنان قامتاماسىز ەتۋ ورىس تاراپتان بولادى"، - دەدى قىرعىزستاننىڭ قورعانىس ءمينيسترىنىڭ ورىنباسارى المازبەك قاراسارتوۆ.

وسىعان دەيىن رەسەيدىڭ مەملەكەتتىك دۋماسى قىرعىزستان مەن رەسەي اراسىنداعى كەلىسىمدى راتيفيكاسيالاعان.

بىلتىر تامىزدا ماسكەۋدە قىرعىزستاننىڭ قورعانىس ءمينيسترى باقتىبەك بەكبولوتوۆ پەن رەسەيدىڭ قورعانىس ءمينيسترى سەرگەي شويگۋ قۇجاتقا قول قويعان.

قىرعىزستاننىڭ ورىس اسكەري بازاسىنا بىرنەشە وبەكت كىرەدى. ولار "كانت" اۆيابازاسى، قاراكول قالاسىنداعى سىناۋ بازاسى، چالدىبار قىستاعىنداعى بايلانىس ءتۇيىنى، مايلۋۋ-سۋۋ قالاسىنداعى اۆتونومدى سەيسميكالىق پۋنكت. بۇل نىسانداردىڭ ءبارى 2012 جىلدان بەرى قىرعىزستان مەن رەسەيدىڭ بىرىككەن ورىس بازاسىنا بىرىكتىرىلدى.