قازاقستاندا 12 قازاندا "جەل توقتاعان جەر" دەگەن فيلم پروكاتقا شىعۋى ءتيىس بولعان.

ءبىراق ول كارتينانىڭ پرەمەراسى وتكەننەن كەيىن، بۇل تۋىندىنى ۇلكەن ەكرانعا شىعارۋ قاراشا ايىنا شەگەرىلىپتى.

جالپى، "قاراشاعا قالسىن" دەپ كەيىنگە شەگەرىلە سالىنعان، انىعىندا كورەرمەنگە ناقتى قاشان جول تارتاتىنى مۇلدەم بەلگىسىز.

الدىن الا كورسەتىلىمگە قاتىسقان جۇرت بۇل فيلمنەن جىلاپ شىققان.

ەندى بۇل تۋىندى ەكرانعا شىقپاي، سول كۇيى كورمەي قالۋىمىز دا مۇمكىن.

بۇل فيلمدە ءبىزدىڭ بابالارىمىزدىڭ باسىنان وتكەن اۋىر وقيعالاردىڭ ءبىرى باياندالادى.

وتكەن عاسىردىڭ 20-30-جىلدارى كەڭەس ۇكىمەتى "ۇجىمداستىرۋ" سىلتاۋىمەن ۇيىمداستىرعان گەنوسيد سالدارىنان قازاق حالقىنىڭ باسىم بولىگى اشتان قىرىلدى.

بۇل كەزەڭ قازاق حالقىنىڭ تاريحىندا "اشارشىلىق" دەگەن اتپەن ماڭگىلىك جازىلىپ قالدى.

فيلم ەكى ۇلدىڭ اناسى، جۇپار ەسىمدى جاس كەلىنشەكتىڭ تاعدىرىن كورسەتەدى. كۇيەۋى اساندى كسرو ىشكى ىستەر حالىق كوميسسارياتى تۇتقىنداپ، ۇجىمداستىرۋ اياسىندا مالى تاركىلەنەدى. 

اۋىل حالقى اشتىقتان قاشىپ، تاراپ كەتەدى. بالالارمەن بىرگە جۇپار دا امالسىز جەرىنەن كەتۋگە ءماجبۇر. جولدا ول ءتۇرلى ادامداردى كەزدەستىرەدى: ءۇيسىز، اش قالعان بۇرىنعى شەنەۋنىكتى، كۇللى قازاقتىڭ اقىرىن بولجايتىن جىندى كەمپىردى جانە ءبىر ءۇزىم نان ءۇشىن بارىنە كونەتىن اش، شاراسىز قازاقتى. 

اقىرىندا جۇپاردىڭ بار تاماعى تاۋسىلىپ، ەندى ول تاپقانىن السىرەگەن ەكى بالانىڭ بىرىنە عانا بەرۋگە ءماجبۇر. قاي بالامدى امان الىپ قالايىن دەگەن اۋىر تاڭداۋ...

Qamshy.kz "جەل توقتاعان جەر" ءفيلمىنىڭ پروكاتى نە سەبەپتى كەيىنگە شەگەرىلگەنىن انىقتاۋ ءۇشىن ءفيلمنىڭ اۆتورلارىنا سۇراۋ جىبەردى.