قازاقستاندا 12 قازاندا "جەل توقتاعان جەر" دەگەن ءفيلمنىڭ پروكاتقا شىعۋى ءتيىس بولعانىن، ءبىراق ول كارتينانىڭ پرەمەراسىنان سوڭ بۇل تۋىندىنى ۇلكەن ەكرانعا شىعارۋ بەلگىسىز سەبەپپەن كەيىنگە شەگەرىلگەنىن جازعان بولاتىنبىز.
Qamshy.kz-كە قازاقستاندا بۇل كارتينانىڭ پروكاتى نە سەبەپتى كەيىنگە شەگەرىلگەنىن "جەل توقتاعان جەر" ءفيلمىن تۇسىرگەن "اردفيلم" كينوكومپانياسى ءتۇسىندىردى:
"جەل توقتاعان جەر" كينوكارتيناسىنىڭ پروكاتى 2023 جىلدىڭ 12 قازانىندا باستالادى دەپ جوسپارلانعان بولاتىن.
الايدا قازاقستاندىق كينو كورەرمەندەرى تاراپىنان رەجيسسەر مۇرات ەسجاننىڭ "ويان، قازاق" فيلمىنە دەگەن قىزىعۋشىلىعىنان تۋىنداعان ۇلكەن رەزونانستان كەيىن جانە كارتينانى كينوتەاتردان كورىپ ۇلگەرمەگەندەردىڭ نارازىلىعىنان سوڭ ديستريبيۋتورلار "ويان، قازاق" ءفيلمىنىڭ پروكات مەرزىمىن ۇزارتۋ تۋرالى شەشىم قابىلدادى.
تيىسىنشە، ءبىزدىڭ "جەل توقتاعان جەر" اتتى كارتينامىز 1920-1930 جىلدارداعى "اشارشىلىق" كەزەڭىندەگى وقيعالاردى سۋرەتتەيتىندىكتەن، ءبىر تاريحي زاماندى قامتيتىن ەكىنشى كارتينانىڭ قاباتتاسىپ پروكاتقا قاتار شىعۋىن كورەرمەن تارتۋ تۇرعىسىنان ءتيىمسىز دەپ سانادىق.
كينو پروكاتشىلارى مەن ءىرى ديستريبيۋتورلارمەن جوسپارلى جۇمىس جۇرگىزىپ، ەلىمىز بويىنشا قولدان كەلگەنشە كوبىرەك كينوتەاتر قامتىپ، كوبىرەك كورەرمەن تارتۋ ماقساتىندا "جەل توقتاعان جەر" ءفيلمىنىڭ پروكاتىن بيىلعى قاراشا ايىنا شەگەرۋ تۋرالى شەشتىك"،
دەلىنەدى "اردفيلم" كينوكومپانياسى بەرگەن تۇسىنىكتەمەدە.
پىكىر قالدىرۋ