بۇدان ەكى جىل بۇرىن قازپوشتادا جۇمىس باياۋ جۇرگىزىلەتىن. سودان بەرى جاعداي وزگەردى مە دەسەك، ءالى سول قالپىندا. باسقا قالا تۇگىلى، الماتىداعى بولىمشەلەرىندە ءالى وزگەرىس جوق.

ءبىر زاتتى باسقا قالاعا سالىپ جىبەرۋ ءۇشىن ۇزىن-سونار كەزەكتى ايتپاعاندا، ماسەلەن، №5 بولىمشەدەگى قىزمەتشىلەردىڭ دورەكىلىگى بولەك تاقىرىپ. ءبىر كىسىنىڭ زاتىن بالقاش قالاسىنا سالماق بولىپ، ىشتەگى قىرعىن كەزەككە قاراپ «ءاي، بىر-ەكى ساعاتسىز تىرلىگىمىز بىتپەيدى-اۋ» دەستىك. كاسساداعىلاردىڭ تىرلىگى تىم باياۋ. كەلگەن حالىققا ايقايلاپ، تاڭ اتپاستان جۇيكەلەرى جۇقارىپ وتىر. ەندى ءبىر جىگىتتىڭ ۇزاق كۇتكەن كەزەگى جەتكەن ەكەن، وعان قىزمەتشىلەر «تولەمدى تەك قاعاز اقشامەن نە كارتامەن عانا تولەيسىز» دەدى. ال  تولەۋ ءتارتىبى تەك سولاي ەكەنى ەش جەردە ەسكەرتىلىپ، جازىلماعان.

ودان بولەك، گازەت-جۋرنالدارعا جازىلۋ، تاراتۋ جۇمىستارىندا دا ماسەلە كوپ. «بالبۇلاق» جۋرنالىنىڭ قىزمەتكەرى رايسا ۇمبەتبايەۆا قازپوشتانىڭ قىزمەت كورسەتۋىندە كوپتەگەن كەمشىلىكتەر بار ەكەنىن  ايتادى.

– مەنىڭ جۇمىسىم پوشتامەن بايلانىستى بولعاندىقتان، بولىمشەگە ءجيى بارامىن. سوندا بايقايتىنىم، ءوز ءىسىنىڭ مامانى ەمەس بىرەۋلەر وتىرادى. جۇمىسسىز بىرەۋلەردى تاۋىپ اكەپ، وتىرعىزىپ قويعانداي. نە سالەمدەسۋدى بىلمەيدى، نە ەشتەڭەنى ءتۇسىندىرىپ ايتپايدى. مىسالى، مەن بالامدى جۋرنالعا جازدىرايىن دەسەم، ءار بالانىڭ ءوزىنىڭ جەكە ءجسن-ى قاجەت دەيدى. ال نەگىزى بالانىڭ اتا-اجەسى، اتا-اناسى ءوز جسن-ىمەن مەن بالاسى مەن نەمەرەسىنىڭ اتىنا جۋرنال جازدىرۋعا قۇقىلى ەمەس پە؟! سودان كەيىن باسقا وڭىرلەرگە، تۇرمەلەرگە، ارمياعا جىبەرەتىن جولدامالارمەن بارلىق قىزمەتتى بىرگە ارالاستىرىپ جىبەرگەن، مۇنداي نارسەلەر ادامنىڭ ۋاقىتىن الادى. تەلەفون ارقىلى تولەمگە كوشكەنىمىزگە كوپ بولدى، نە ونىمەن، نە كارتامەن تولەي سالايىن دەسەڭ، ادەتتە اپپاراتتارى جۇمىس ىستەمەي تۇرادى،– دەيدى ول. 

وكىنىشتىسى، قازپوشتاداي مەكەمەدە كوپتەگەن كەمشىلىكتەردىڭ ورىن الۋىنا ايلىقتىڭ ازدىعى سەبەپ. ۇلكەن وقۋ بىتىرگەن جاستاردىڭ باسقا باسقا، قازپوشتاعا بارا قويماسى انىق. كەلگەن كۇننىڭ وزىندە مۇنداي مەكەمەدەن جەمقورلىق سحەمالارىن ىزدەيدى. قازپوشتادا وتكەن ايدا عانا 273 ملن تەڭگە جىمقىرىلىپ، ايماقتارداعى 7 فيليالىنا قاتىستى 11 قىلمىستىق ءىس اشىلعان. سويتسەك، قازپوشتا قىزمەتكەرلەرى ۇستەمە اقىلار الىپ، حالىقتىڭ قالتاسىن قارماپ كەلگەن ەكەن.