قازاقتاردىڭ ورىستىڭ «كرەششەنيە» مەرەكەسىنە قاتىسىپ جاتقان ۆيدەولارى تارادى تاعى دا الەۋمەتتىك جەلىلەردە.

بىرەۋ ءۇش رەت «اللاھۋ اكبارىن» ايتىپ سۇڭگىپ شىقتى.

«بۇگىن «كرەششەنيەنى» تويلاتىپ، ەرتەڭ جۇما نامازىنا بارامىز» دەپ قويادى تاعى ءبىرى. ورىستار اڭ-تاڭ. قازەكەڭدەردىڭ وزدەرىمەن جاعالاسىپ شوقىنىپ جۇرگەندەرىن قولدايتىندار دا بار. مۇزداي سۋعا ءتۇسۋ پايدالى-مىس دەيدى.

قوعام بەلسەندىسى جانىبەك قوجاباي قىستا مۇزداي سۋعا سۇڭگۋدى اقىماقتىق سانايدى.

– ءقازىر ءوزى دىندەگىلەردە ەس جوق، ەشتەڭەنىڭ بايبىنا بارا بەرمەيدى. ييسۋس قانداي سۋعا ءتۇسىپ ەدى، سوعان كەلەيىك. ول تاياۋ شىعىستاعى ەشقاشان مۇز قاتپايتىن يوردان وزەنىنە ءتۇسۋشى ەدى. بۇل وزەن ءتورت مەملەكەتتى كەسىپ وتەدى: سيريا، ليۆان، پالەستينا، يزرايل. ال ەندى وسى ەلدەردەگى ورتاشا اۋا رايى +20 گرادۋستىڭ ماڭايى. بىلايشا ايتقاندا، بىزدەگى مامىر، قىركۇيەك ايلارىنىڭ اۋا رايى. ەگەر ييسۋس قيىر شىعىستا، سىبىردە، نە استانا ماڭايىندا ءومىر سۇرگەندە -30 گرادۋس ايازدا وزەننىڭ مۇزىن ويىپ سۋعا تۇسەرىنە كۇماندانامىن. كەيبىر پراۆوسلاۆيالىق شىركەۋ باسشىلارى ءدال بۇلاي مۇز استىنداعى سۋعا ءتۇسۋدىڭ قاجەت ەمەستىگىن ەسكەرتەدى.

ەندى سول سۋىق سۋعا ءتۇسىپ جۇرگەن قازاقتارعا كەلسەك، دەنساۋلىق ءۇشىن تۇسەمىز دەيدى. دەنساۋلىق ءۇشىن دەسە، قۇدايدىڭ باسقا كۇندەرى دە جەتىپ جاتىر عوي؟! سوسىن ونداي ارەكەتكە كەمى 1 جىل دايىندالۋ كەرەك. جىلىدان باستاپ اقىرىن-اقىرىن كۇندەلىكتى شومىلاتىن سۋىڭدى سالقىنداتىپ، ورگانيزمىڭدى سۋىققا ۇيرەتىپ الۋ قاجەت. ال جىلى سۋعا جۋىنىپ ءجۇرىپ، مۇزدى سۋعا كۇمپ ەتسەڭ، بۇكىل مۇشەڭ، ميىڭ، جۇرەگىڭ، بۇيرەگىڭ، باۋىرىڭ مۇز استىندا شوك الادى. بايقاماساڭ، جۇرەگىڭ توقتاپ قالۋى دا مۇمكىن.

جالپى، بوي ۇيرەنسىن-ۇيرەنبەسىن مۇز استىنداعى سۋعا ءتۇسۋ ەسسىزدىك قوي. دەنساۋلىق كەرەك بولسا، سالقىن دۋش قابىلداۋدى ادەتكە اينالدىرۋ كەرەك، – دەيدى ول.

راس-اۋ، قازىرگى قازاقتى ەشكىم ماجبۇرلەمەسە دە ءوز ەركىمەن شوقىنعانى قىزىق ەكەن.