«وتكەندە مەشىتكە باردىم، ۋاعىز تىڭدادىم، اينالاما زەر سالا قارادىم. جالپى، ماعان الەمنىڭ ءار تۇكپىرىندەگى مەشىتتەردە بولۋ باقىتى بۇيىرىپتى: ىستامبۇل، ابۋ-دابي، مەككە، يەرۋساليم، مىسىر دەيسىز بە، بارىندە. قاي قايسىسىن الساڭىز ۇنەمى ءىشى تولى قىج-قىج قايناعان جۇرت، تەك جۇما كۇنى عانا ەمەس.

ءبىر قىزىعى، ونداعى ادامداردىڭ قوزعالىسى كوشەدەگى كولىكتەردىڭ قوزعالىسى سەكىلدى ءبىر رەتكە كەلتىرىلگەن. ياعني، ادامدار ءبىر باعىتپەن قانا ءجۇرىپ، مەشىتكە كىرىپ-شىعادى. كوبىنە كىرە بەرىستە اياق-كيىم سالۋعا ارنالعان پاكەت تولى اپپارات تۇرادى، وندا دا بۇل ادامنىڭ باسقا ەسىكتەن شىعىپ كەتۋى ءۇشىن ىڭعايلانىپ جاسالعان. يمام دا مەشىتتەگى ءتارتىپتى ۋاعىز اراسىندا اراكىدىك ەسكە سالىپ وتىرادى. راسىندا، ادامداردىڭ بىر-بىرىنە دەگەن قۇرمەتى ۇجىمدىق ءمىناجاتتىڭ ماڭىزدى بولىگى ەمەس پە؟

ال بىزدەگى جاعداي باسقالاۋ

ەسىكتەردىڭ ۇلكەندىگىنە قاراماستان ونى ايقارا اشا بەرمەيدى. ونىڭ ۇستىنە VIP، ياعني ايىرىقشا قوناقتار دەگەن تاعى بار. نامازدان كەيىن بار ادام اياق-كيىمدەرىن شەشىپ، قويىپ كەتكەن سورەگە قاراي جاپپاي ۇمتىلادى. ناعىز ىعى-جىعى ءسات سول ارادا بولادى.  ودان كەيىن ناماز وقۋ باستالىپ كەتسە دە ءجۇرىس-تۇرىس ازايمايدى. كەشىگىپ كەلگەندەر ورىن ىزدەپ الەك بولىپ جاتادى. ولارعا وزگەلەر كوزدەرىن الارتىپ، ءتىپتى ۇرسىپ تا بەرەدى.

قازىرگى يمامداردىڭ ۋاعىزىن تىڭداساڭىز، كوبىنە بۇل ەمەس، ارعى دۇنيە تۋرالى كوپ ايتادى. بۇگىنگى قوعامدى مازالايتىن سۇراقتاردى تەك جاناپ وتەدى. ۇيدەگى ۇرىس-كەرىس، ەسىرتكى، لۋدومانيا تۋرالى مۇلدە ءسوز جوق. اراب ەلدەرىندە كوپتەگەن عاسىر بۇرىن بۇل تاقىرىپتار وزەكتى بولعان شىعار. ءقازىر ولار مۇنى ايتپايدى، ەسەسىنە كەز-كەلگەن ماڭىزدى ءارى كۇردەلى ومىرلىك سۇراقتارىڭىزعا وپ-وڭاي جاۋاپ بەرىپ وتىرادى.

مىنە، بىزدىكىلەر سودان ۇيرەنسە عوي دەيسىڭ... ەڭ قۇرىعاندا، مەشىتكە كىرىپ-شىعۋ ءتارتىبىن ءبىر جونگە كەلتىرىپ السا جاقسى بولار ەدى»، دەپ جازىپتى ول كىسى جەلىدە.