پارلامەنت قابىلداعان زاڭ بويىنشا دەنساۋلىققا جەڭىل زيان كەلتىرگەندەر قىلمىستىق جاۋاپقا تارتىلادى. سونىمەن قاتار ەندى زورلىق كورسەتكەن ادامدى جابىرلەنۋشى پوليسياعا ارىزدانباسا دا ۇستاۋعا بولادى.
"تابامىز. كوبەيىپ كەتپەيدى. ءبىز ولاردى ءقازىر دە قاماپ جاتىرمىز. ءبىر عانا ەرەكشەلىگى بۇرىن اكىمشىلىك زاڭناما اياسىندا قاماساق، ەندى قىلمىستىق زاڭ اياسىندا تەرگەۋ يزولياتورىندا وتىرادى. ءبىز وسى ساناتتى تەرگەۋ يزولياتورىندا ۇستاۋ مۇمكىندىگىن قاراستىرۋ ءۇشىن ارنايى زاڭ تۇرعىسىنان ەرەكشەلىك جاسادىق. بارىنە ورىن تابامىز دەپ ويلايمىز"، – دەدى يگور لەپەحا سەناتتا.
زاڭ ماقۇلدانعان كەزدە كۇتىلەتىن ناتيجەلەر: ايەلدەردىڭ قۇقىقتارى مەن بالالاردىڭ قاۋىپسىزدىگىن قورعاۋدى كۇشەيتۋ، بالالاردى سەكسۋالدىق زورلىق-زومبىلىقتان قورعاۋدى كۇشەيتۋ، ءوزىن-وزى ءولتىرۋ جانە سەكسۋالدىق زورلىق-زومبىلىق جاعدايلارىن ازايتۋ، ومىردە قيىن جاعدايلارعا تاپ بولعان وتباسىلار ءۇشىن جاعدايدى جاقسارتۋ، ارناۋلى الەۋمەتتىك كورسەتىلەتىن قىزمەتتەردىڭ ساپاسىن جاقسارتۋ، نەكە جانە وتباسى ينستيتۋتىن نىعايتۋ.
پىكىر قالدىرۋ