قازاقستاندا قانداستارعا بەرىلەتىن وڭىرلىك كۆوتا سانى ارتادى. باستاپقى جوسپار بويىنشا، 2433 كۆوتا بەرىلۋى ءتيىس بولسا، ولاردىڭ سانى ەندى 3033 بولادى. بۇل تۋرالى اشىق نقا پورتالىندا جاريالانعان ەڭبەك جانە حالىقتى الەۋمەتتىك قورعاۋ ءمينيسترى بۇيرىعىنىڭ جوباسىنان بەلگىلى بولدى، دەپ حابارلادى ينفورمبيۋرو سايتى.

ەسەسىنە، قازاقستانعا قونىس اۋدارۋشىلارعا بەرىلەتىن كۆوتا سانى 600-گە ازايادى. قانداستارعا ارتىق كۆوتا بەرۋ وسى شەگەرۋدىڭ ەسەبىنەن كوزدەلىپ وتىر. سايكەسىنشە، بيىل قونىس اۋدارۋشىلارعا 6450 كۆوتا بەرىلەدى. ال باستاپقى جوسپار بويىنشا بۇل ءمان 7050-گە تەڭ بولاتىن. 

وڭىرلىك كۆوتا بويىنشا قازاقستانعا كوشىپ كەلگەن قانداستارعا مەملەكەتتەن الەۋمەتتىك قولداۋ كورسەتىلەدى. اتاپ ايتقاندا، وتباسىنىڭ ءاربىر مۇشەسىنە 241 500 تەڭگەدەن بەرىلەدى. ءبىر جىلعا دەيىن ءۇي جالداۋ ءۇشىن اي سايىن 103 500 تەڭگە تولەنەدى. 

2023 جىلى 2337 قانداس وڭىرلىك كۆوتاعا يە بولعان. ولار قوستاناي، سولتۇستىك قازاقستان، اقمولا، پاۆلودار، اباي جانە شىعىس قازاقستان وبلىستارىنا قونىستاندى. وڭىرلىك كۆوتا بويىنشا قانداستاردى ەڭ كوپ قابىلداعان وبلىس – پاۆلودار وبلىسى. مۇندا 972 قانداس قونىستانعان. كەيىنگى ورىندارعا قوستاناي جانە اقمولا وبلىستارى يە.