ق ر توتەنشە جاعدايلار مينيسترلىگىنىڭ باسپا ءسوز قىزمەتى حابارلاعانداي، قازىرگى ۋاقىتتا قاراعاندى جانە پاۆلودار وبلىستارى، استانا قالاسى تجد كۇشتەرى مەن جەرگىلىكتى اتقارۋشى ورگاندارىنان، تجم 52859 اسكەري بولىمىنەن، «باياناۋىل» مۇتپ-دان جالپى سانى 609 ادام جانە 110 بىرلىك تەحنيكا، «قازاۆياقۇتقارۋ» اق مەن ق ر قورعانىس مينيسترلىگىنەن 4 اۋە كەمەسى ءورتتى جويۋ جۇمىستارىنا جۇمىلدىرىلدى.

«قاراعاندى وبلىسىنىڭ تەرەكتى اۋىلىندا جانە پاۆلودار وبلىسىنىڭ جەلتاۋ قىستاعىندا ءورت ورنى دالالىق ءورت ءسوندىرۋ شتابتارى ورنالاستىرىلدى. ءورتتى ءسوندىرۋ جۇمىستارى جەرۇستى جانە اۋە كولىكتەرىمەن جۇرگىزىلىپ جاتىر. جالپى 12 جاۋىنگەرلىك ۋچاسكە انىقتالدى. وبلىستىق تجد جانە تجم كوماندالىق ورتالىعىندا جەدەل شتابتار جۇمىس ىستەپ جاتىر. اۋە كەمەلەرى ءورت وشاقتارىنا 15 رەت بارىپ، جالپى كولەمى 22 توننا سۋ توكتى»، — دەپ مالىمدەدى مينيسترلىكتەن.

مينيسترلىك بۇعان قوسا، اقپاراتتىق-پسيحولوگيالىق قولداۋ كورسەتۋ ءۇشىن قاراعاندى وبلىسىنىڭ تجد 8 721 2 51 72 23، پاۆلودار وبلىسىنىڭ تجد 8 718 2 20 11 12 جەدەل جەلى تەلەفوندارى جۇمىس ىستەيتىنىن ەسكە سالدى.

ەسكە سالا كەتەيىك، 6 قازان كۇنى باياناۋىلدا جەر ورتەنىپ، ءبىر اۋىلدىڭ تۇرعىندارى ءقاۋىپسىز اۋماققا كوشىرىلدى.

ءورت شالعان جەرگە جاقىن ورنالاسقان جۇمات شانين اۋىلىنا ءقاۋىپ ءتونىپ تۇرعان جوق 

ال بۇگىن تۇسكە تامان پاۆلودار وبلىسىنىڭ اكىمى باياناۋىلداعى ءورتتىڭ وقشاۋلانعانىن حابارلادى.