الماتى. قازاقپارات - الماتىدا قازاق ادەبيەتتانۋ عىلىمى مەن الاش ارداقتىلارىنىڭ مۇرالارىن تاۋەلسىزدىك تۇرعىسىنان سارالاۋعا باعىتتالعان عىلىمي مونوگرافيالاردىڭ تۇساۋى كەسىلدى.
بۇگىن الماتىدا ق ر ۇلتتىق كىتاپحاناسىنىڭ كورمەلەر زالىندا م. و. اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى، فيلولوگيا عىلىمدارىنىڭ دوكتورى، پروفەسسور ايگۇل ءىسىماقوۆانىڭ «تاۋەلسىزدىك جانە الاش عىلىمى»، «جازعان ءسوز جانىم اشىپ الاشىما...»، «قازىرگى ادەبيەت پەن ادەبيەتتى زەرتتەيتىن قاۋىم»، «تاۋەلسىزدىك جانە الاش ادەبيەتتانۋى»، «قازىرگى ادەبيەتتانۋدىڭ تەوريالىق ماسەلەلەرى»، «قازاق ادەبيەتتانۋىنداعى تاۋەلسىزدىك يدەياسى»، «قازاق ادەبيەتتانۋى» دەپ اتالاتىن عىلىمي زەرتتەۋلەرى جانە فيلولوگيا عىلىمدارىنىڭ كانديداتى، وسى ينستيتۋتتىڭ اعا عىلىمي قىزمەتكەرى ايسۇلۋ ويسىلبايدىڭ «احمەت بايتۇرسىن ۇلى: «ادەبيەت تانىتقىشتاعى» قازىرگى ادەبيەت تەورياسى»دەپ اتالاتىن عىلىمي زەرتتەۋ كىتابىنىڭ تۇساۋى كەسىلدى.
تۇساۋكەسەر ءراسىمىن ۇلتتىق كىتاپحاناسىنىڭ باس ديرەكتورى، ق ر مەملەكەتتىك سىيلىعىنىڭ يەگەرى، قازاقستاننىڭ ەڭبەك سىڭىرگەن قايراتكەرى، جازۋشى الىبەك اسقار جۇرگىزدى.
يگى شاراعا م.و. اۋەزوۆ اتىنداعى ادەبيەت جانە ونەر ينستيتۋتىنىڭ وكىلدەرى، اقىندار مەن جازۋشىلار، الاش قايراتكەرلەرىنىڭ ۇرپاقتارى جانە ستۋدەنتتەر قاتىستى.
«ءبىز الاش ارداقتىلارىنىڭ مۇرالارىنا سوڭعى كەزگە دەيىن كەڭەستىك جۇيەنىڭ كوزقاراسىمەن قاراپ كەلدىك. وسى ءبىر كەڭەستىك پسيحولوگيادان ارىلا الماي جۇرگەندەرىمىز دە بار. سوندىقتان، بۇل ەڭبەكتەر ەشكىمدى بەيجاي قالدىرمايدى. مەنىڭ ويىمشا، بۇل قازاق ۇلتىن تانۋ ءۇشىن، ەگەمەندىكتىڭ قۇندىلىعىن تانۋ ءۇشىن، بولاشاعىمىزدىڭ باعدارشامى ىسپەتتەس وتە قاجەت دۇنيەلەر. ولاردا قازاق ادەبيەتتانۋىنىڭ باستاۋلارى مەن دامۋى جانە ونىڭ باستى تەوريالىق ماسەلەلەرى، ەجەلگى ادەبيەت ۇلگىلەرىنىڭ زەرتتەلۋى، الاش ادەبيەتتانۋى، قازىرگى ادەبي بايلانىستاردىڭ تەوريالىق نەگىزى، بۇگىنگى ابايتانۋ مەن الاشتانۋ، الەمدىك ادەبيەتتانۋ مەن پوستمودەرنيزم تۋرالى كاسىبي زەرتتەۋلەر تاۋەلسىزدىك كەزەڭى تۇرعىسىنان تۇڭعىش رەت جۇيەلى تۇردە سارالانعان»، - دەدى ءوز سوزىندە م. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى، فيلولوگيا عىلىمدارىنىڭ دوكتورى، ق ر ۇعا كوررەسپوندەنت-مۇشەسى ءۋاليحان قاليجان ۇلى.
ايتا كەتەلىك، كىتاپتاردا ءال-فارابي، شوقان، ىبىراي، ابايدان باستالاتىن قازاق ادەبيەتتانۋ عىلىمىنىڭ نەگىزدەرى، الاش عالىمدارى: ءا. بوكەيحان، ا. بايتۇرسىن ۇلى، م. دۋلات ۇلى، ح. دوسمۇحامەد ۇلى، ج. ايماۋىت ۇلى، م. جۇماباي، ق. كەمەڭگەر ۇلى، ى. مۇستانباي ۇلى، س. ءسادۋاقاس ۇلى، ش. قۇدايبەردى ۇلى، ق. جۇبانوۆ، م. تىنىشبايەۆ، س. ج. اسپاندياروۆ، ە. بەكماحانوۆ، م. و. اۋەزوۆ، ب. كەنجەبايەۆ، ە. ىسمايىلوۆ، ت. نۇرتازين، ق. جۇمالييەۆتىڭ ادەبيەتتانۋلىق زەرتتەۋلەرى جانە ادەبيەتتانۋشىلار ر. سىزدىقوۆا، ز. قابدولوۆ، م. مىرزاحمەت ۇلىنىڭ عىلىمي ەڭبەكتەرى تاۋەلسىزدىك كەزەڭى تۇرعىسىنان قاراستىرىلعان.
دەرەككوز: قازاقپارات
