ءماجىلىس دەپۋتاتتارى “مادەنيەت جانە ءبىلىم بەرۋ ماسەلەلەرى بويىنشا زاڭنامالىق وزگەرىستەر ەنگىزۋ تۋرالى” زاڭ جوباسىن ءبىرىنشى وقىلىمدا ماقۇلدادى.

بۇل قۇجاتتىڭ ماڭىزدى تۇستارىنىڭ ءبىرى – 10-11 سىنىپ وقۋشىلارىنا مەكتەپ باعدارلاماسىمەن قاتار، قوسىمشا كاسىپتىك داعدىلاردى مەڭگەرۋگە مۇمكىندىك بەرىلەدى.

ەگەر مەكتەپ ورنالاسقان جەردە مۇنداي مۇمكىندىك بولسا، وقۋشىلار ءوز ەركىمەن قوسىمشا كاسىپتى يگەرە الادى. بۇل اسىرەسە اۋدان ورتالىقتارىندا ىڭعايلى.

وقۋشىلار تاڭەرتەڭ مەكتەپكە بارىپ، تۇستەن كەيىن سول جەردەگى كوللەدجدە سانتەحنيك، اسپاز سياقتى ماماندىقتاردى وقي الادى. ولار قىسقارتىلعان باعدارلاما بويىنشا تەك ءپروفيلدى پاندەردى مەڭگەرىپ، ارنايى گرانتپەن ءبىلىم الادى. وسىلايشا، مەكتەپتى بىتىرگەندە قولىندا قوسىمشا ماماندىعى بار تۇلەك ەڭبەك نارىعىنا دايىن بولىپ شىعادى، – دەيدى ءماجىلىس دەپۋتاتى اسحات ايماعامبەتوۆ.

ول بۇل جوبانىڭ جاس تۇلەكتەرگە ۇلكەن مۇمكىندىك بەرەتىنىن ايتادى.

وقۋ-اعارتۋ مينيسترلىگى 2022 جىلدان باستاپ وسىنداي پيلوتتىق جوبانى جۇزەگە اسىرىپ كەلەدى. ءقازىر بۇل باعدارلاما ەلدىڭ 17 وڭىرىندەگى 100-دەن استام مەكتەپ پەن 40-تان استام كوللەدجدە ىسكە اسۋدا. وقۋ 16 ءتۇرلى ماماندىق بويىنشا جۇرگىزىلىپ، العاشقى ناتيجەلەرى دە بار. بيىلدىڭ وزىندە 700-دەن استام تۇلەك كاسىپتىك بىلىكتىلىك الىپ، جۇمىسقا ورنالاسۋعا مۇمكىندىك الماق.

ەسكە سالا كەتەيىك، وسىعان دەيىن كىتاپحانالارعا تابىس تابۋ قۇقىعى بەرىلەتىنى تۋرالى جازدىق. دارىندى بالالارعا ءبىر رەتتىك سىياقى بەرىلەتىنى تۋرالى دا ايتىلدى.