2024 جىلدىڭ اقپان ايىندا الماتى وبلىسىندا ۇيگە باسىپ كىرىپ، بالالارعا شابۋىل جاساعان ەر ادام سوتتالدى.

وتكەن جىلدىڭ 16 اقپانىندا الماتى وبلىسىنىڭ جامبىل اۋدانىندا بەلگىسىز بىرەۋ ۇيگە باسىپ كىرىپ، ءتورت بالاعا شابۋىل جاساعان ەدى. ايتۋلارىنشا، ەر ادام ولاردى ۇرىپ-سوعىپ، بايلاپ، تاماقتارىنا پىشاق تاقاعان. 

بالالاردىڭ ايعايىن كورشىلەرى ەستىپ، جۇگىرىپ كەلگەن. كۇدىكتىنى پوليسەيلەر ءىزىن سۋىتپاي ۇستاپ، بالالار اۋرۋحاناعا جەتكىزىلدى.

ول كەزدە الماتى وبلىسىنىڭ پروكۋراتۋراسى سوتتالۋشىعا قىلمىستىق كودەكستىڭ 126-بابى 2-بولىگىنىڭ 5 جانە 7-تارماقتارى ( ەكi نەمەسە ودان دا كوپ ادامدى باس بوستاندىعىنان زاڭسىز ايىرۋ)، 149-باپتىڭ 2-بولىگى (تۇرعىنجايعا قولسۇعىلماۋشىلىقتى بۇزۋ)، 120-باپ 1-بولىگى (زورلاۋ) جانە 120-باپتىڭ 4-بولىگى (زورلاۋ، ياعني جابىرلەنۋشىگە نەمەسە باسقا ادامدارعا كۇش قولدانىپ نەمەسە ونى قولدانۋ قاتەرىن ءتوندىرىپ نە جابىرلەنۋشىنىڭ دارمەنسىز كۇيىن پايدالانىپ جىنىستىق قاتىناس جاساۋ) بويىنشا ءىس قوزعادى. 

الماتى وبلىسى جامبىل اۋدانىنىڭ پروكۋراتۋراسىنىڭ مالىمەتىنشە، سوتقا دەيىنگى تەرگەۋ بارىسىندا كامەلەتكە تولماعان قىزعا قاتىستى "زورلاۋ" بابى راستالدى.

"كامەلەتكە تولماعان بالانى زورلاۋ فاكتىسى انىقتالدى. قورىتىندىسى بويىنشا قىلمىستىق ءىس ءمانى بويىنشا قاراۋ ءۇشىن الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا جولداندى. سوت ۇكىمىمەن سوتتالۋشى ي.ب.ن. 21 جىلعا باس بوستاندىعىنان ايىرۋ جازاسىنا كەسىلدى (سوت اكتىسى زاڭدى كۇشىنە ەندى)"، – دەلىنگەن حابارلامادا.

ۆەدومستۆونىڭ حابارلاۋىنشا، قىلمىستىق-پروسەستىك كودەكستىڭ 29-بابىنا (جاريالىلىق) سايكەس كامەلەتكە تولماعانداردىڭ قىلمىستىق قۇقىق بۇزۋشىلىقتارى، جىنىستىق قول سۇعىلماۋشىلىققا قارسى قىلمىستار تۋرالى، پروسەسكە قاتىسۋشىلاردىڭ ءومىرىنىڭ ينتيمدىك اسپەكتىلەرى تۋرالى اقپاراتتى قورعاۋ نەمەسە جابىرلەنۋشىلەردىڭ، كۋالاردىڭ جانە ولاردىڭ تۋىستارىنىڭ قاۋىپسىزدىگىن قامتاماسىز ەتۋ ماقساتىندا سوتتا ىستەر جابىق تارتىپتە جۇرگىزىلەدى.

"سوتتالۋشىعا قاتىستى سوت وتىرىسى جابىق ەسىك جاعدايىندا ءوتتى. بۇل قىلمىستىڭ ەگجەي-تەگجەيلەرى جاريا ەتىلمەيدى"، – دەلىنگەن حابارلامادا.