الماتىنىڭ قاق ورتاسىندا ورنالاسقان “يبراگيم نۇسىپبايەۆ” اتىنداعى مەكتەپ-ينتەرناتىنىڭ جەرىن بەلگىسىز ءبىر دوكەيلەر يەمدەنىپ كەتكەن.

بۇل تۋرالى بەلگىلى ءدىنتانۋشى قايرات جولدىباي ۇلى ءوزىنىڭ فەيسبۋك پاراقشاسىندا جازى. 

"بوس تۇرعان جەردىڭ ءبارىن تاۋىسىپ، ەندىگى كەزەك الماتى قالاسىنىڭ قاق ورتاسىنداعى “يبراگيم نۇسىپبايەۆ” اتىنداعى تاريحى تەرەڭ ەڭ العاشقى قازاق مەكتەپ ينتەرناتىنىڭ جەرىنە كەلدى مە؟

سماعۇل ەلۋباي سەكىلدى كورنەكتى جازۋشىلار مەن تالاي ۇلت زيالىلارى تۇلەپ ۇشقان بۇل عىلىم ورداسى قالادا ورنالاسقانىمەن الماتى وبلىسىنا قارايدى. وسىدان ءۇش جىل بۇرىن مەكتەپ جاتاقحاناسىندا كۇردەلى جوندەۋ جۇمىسى باستالعان. مەردىگەردىڭ بولىنگەن قارجىنى جىمقىرۋى، وبلىس جاۋاپتىلارىنىڭ قاداعالاۋىنىڭ ناشارلىعىنىڭ سالدارىنان 4 ايدا ءبىتۋى ءتيىس جوندەۋ جۇمىسى 3 جىلدان بەرى اياقسىز قالعان. سونىڭ سالدارىنان بالالار جاتاقحانا رەتىندە مەكتەپتىڭ ءبىر بولىگىندە تۇرىپ، قالعانىندا وقىپ كەلگەن. ەندى الماتى وبلىس اكىمشىلىگى جاتاقحانانىڭ بىتپەي تۇرعان  جوندەۋ جۇمىسىن اياقتاۋدىڭ ورنىنا مەكتەپتى تولىقتاي جاۋىپ، قونايەۆ قالاسىنا كوشىرۋگە شەشىم شىعارىپتى. قونايەۆتا سالىناتىن عيماراتقا ينۆەستور دا “تاۋىپ” قويىپتى.

ال ەندى وسى تۇستا ورىندى سۇراق. قونايەۆقا جاڭا عيمارات سالىپ، مەكتەپتى كوشىرگەننەن كەيىن الماتى قالاسىنىڭ قاق ورتاسىندا، كورىكتى جەردە ورنالاسقان تاريحي مەكتەپتىڭ تاعدىرى نە بولماق؟ اۋقىمدى جەر ۋچاسكەسىن كىم يەلەنبەك؟ قانداي ماقساتتا قولدانباق؟ ءبىزدىڭ ويىمىزشا مەكتەپ جەرىنە كوز تىگىپ وتىرعان بەلگىلى قۇرىلىس كومپانياسى بار. سولار وبلىس اكىمدىگى “تاپقان” قونايەۆ قالاسىندا جاڭا عيمارات سالىپ بەرمەكشى “جومارت ينۆەستورلار”.  ايتپەسە، جاڭا عيمارات سالعاننان گورى  مەكتەپ جاتاحاناسىندا باستالعان جوندەۋ جۇمىسىن اياقتاۋ وبلىس اكىمدىگىنە الدە قايدا وڭاي ءارى ءتيىمدى ەمەس پە؟

بۇل كۇدىگىمىز ورىنسىز ەمەس.
وسىدان ءبىراز جىل بۇرىن ەسكى بيلىكتىڭ ۋاقىتىندا الماتى قالاسى دوستىق كوشەسىنىڭ بويىندا ورنالاسقان تالاي قازاق زيالىلارى ءبىلىم العان «2 قازاق مەكتەپ-ينتەرناتى اپاتتىق جاعدايدا تۇر” دەپ، قولدان وتىرىك سىلتاۋ ۇيىمداستىرىپ، بىرنەشە گەكتور جەرىن اقشاعا قۇنىققان وليگارحتار بەلدەن باسىپ تارتىپ العان بولاتىن.  ورنىنا “Dostyk Residence” تۇرعىن ءۇي كەشەنىن سالىپ تاستادى.

ءبىز ايتىپ وتىرعان الماتىداعى ەڭ العاشقى مىنا تاريحي مەكتەپتى جاپتىرىپ، جەرىن تارتىپ الۋ ارەكەتىنىڭ دە سەناريى وسىعان ۇقسايدى. اياقسىز قالعان كۇردەلى جوندەۋ جۇمىسىنىڭ سالدارىنان جاتاقحانانىڭ شاڭى شىعىپ، قازىلىپ جاتقان جەرلەرىن ادەيى كورسەتىپ، “اپاتتىق جاعدايدا تۇر” دەگەن سىڭايدا جالدامالى كانالدار مەن بلوگەرلەر ارقىلى ارنايى  اقپاراتتىق مانيپۋلياسيا جاساۋدى باستاپ تا كەتتى.

شىنتۋايتىندا،  مەكتەپ عيماراتىنىڭ  سۇيەگى وتە بەرىك. جەر سىلكىنىسى كەزىندە شىدامدىلىعىن نەشە رەت دالەلدەپ تاستاعان. قابىرعالارىندا ءبىر دە ءبىر شىتىناۋ دا جوق.

ءبىز  مۇنداي باسسىزدىققا استە جول بەرمەيمىز. ەلىمىزدە مەكتەپ جەتپەي، بالالارىمىز ءۇش اۋىسىمدا وقىپ جاتىر. ال مىنالار قالانىڭ كورىكتى جەرىندەگى تاريحي  مەكتەپتى جاۋىپ، جەر ۋچاسكەسىن قولدى ەتپەكشى. تاريحي مەكتەپتىڭ جويۋىلۋىنا، بالالار بولاشاعىن ساۋداعا سالىنۋىنا تۇبەگەيلى قارسىمىز.

كەرىسىنشە قالانىڭ كورىكتى جەرىندە ورىن تەپكەن تاريحي مەكتەپكە رەسپۋبليكالىق ارنايى ستاتۋس بەرىپ، دارىندى بالالارعا ارنالعان ۇلتتىق مەكتەپكە اينالدىرۋىمىز قاجەت.

بۇل بويىنشا وسى مەكتەپتىڭ تۇلەكتەرى، اتا-انا، ۇستازدارى بولىپ پرەزيدەنتكە، ءبىلىم مينيسترلىگىنە، باس پروكۋراتۋراعا ارنايى ارىز-شاعىمىمىزدى دايىنداپ جاتىرمىز. قاجەت بولسا، ۇلتتىق قۇرىلتاي دەڭگەيىندە دە كوتەرەمىز، – دەپ جازادى قايرات جولدىباي ۇلى.