قازاقستاندا قازاق ءتىلىنىڭ ۇلتتىق سوزدىك قورىن قۇرۋ جوسپارلانىپ وتىر. ءتيىستى جوبانى عىلىم جانە جوعارى ءبىلىم مينيسترلىگى ازىرلەدى.
قۇجاتقا سايكەس، ۇلتتىق سوزدىك قورى اكادەميالىق جانە اۋدارما سوزدىكتەر، قازاق ءتىلىنىڭ ۇلتتىق كورپۋسى، تەرمينولوگيالىق بازا جانە ءارتۇرلى فورماتتاعى دەرەكتەر جيىنتىعىن قامتيتىن داتا-سەتتەر نەگىزىندە قالىپتاستىرىلادى.
"جوبانىڭ ماڭىزدى اسپەكتىسى – قازاق ءتىلىنىڭ ۇلتتىق سوزدىك قورى اشىق قولجەتىمدى مەملەكەتتىك اقپاراتتىق جۇيە بولاتىنى. بۇل ونى ءبىلىم بەرۋ جانە عىلىمي ماقساتتاردا، سونداي-اق قازاق ءتىلىن وڭدەۋ تەحنولوگيالارىن دامىتۋ ءۇشىن بارىنشا ءتيىمدى پايدالانۋعا مۇمكىندىك بەرەدى"، – دەلىنگەن قۇجاتتا.
قازىرگى ەرەجەلەردە مىناداي نەگىزگى ۇعىمدار پايدالانىلادى:
- گەنەراسيا – دەرەكتەر مەن الدىن الا بەلگىلەنگەن ەرەجەلەر نەگىزىندە جاڭا كونتەنتتى (ءماتىن، سۋرەت، دىبىس) اۆتوماتتى تۇردە جاساۋ پروسەسى؛
- جاساندى ينتەللەكت (جي) مودەلدەرى – قازاق تىلىندەگى دەرەكتەردى وڭدەۋ تەحنولوگيالارى مەن الگوريتمدەرىن ءتۇرلى جۇيەلەرگە، قوسىمشالارعا نەمەسە پلاتفورمالارعا ەنگىزۋ پروسەسى.
-
ۇلتتىق سوزدىك قورىن قالىپتاستىرۋدىڭ ماقساتتارى:
- قازاق ءتىلىن مادەني قۇندىلىق رەتىندە ساقتاۋ، قورعاۋ جانە دامىتۋ؛
- مەملەكەتتىك ءتىل مارتەبەسىن نىعايتۋ؛
- قازاق ءتىلىنىڭ بارلىق قولدانۋ سالالارىن قامتيتىن رەسۋرستاردى جيناقتاۋ؛
- قولدانىستاعى لەكسيكالىق قۇرامدى جۇيەلەۋ، سيفرلاندىرۋ جانە گەنەراسيالاۋ؛
- قازاق ءتىلىن جاساندى ينتەللەكتكە جانە زاماناۋي تەحنولوگيالارعا بەيىمدەۋ؛
- تىلدىك دەرەكتەردى وڭدەۋ ۇدەرىستەرىن اۆتوماتتاندىرۋ.
جوبا "اشىق نقا" پورتالىندا 2025 جىلدىڭ 19 ناۋرىزىنا دەيىن قوعامدىق تالقىلاۋ ءۇشىن ورنالاستىرىلعان.
پىكىر قالدىرۋ