بۇل تۋرالى قاسىم-جومارت توقايەۆ ۇلتتىق قۇرىلتايداعى سويلەگەن سوزىندە ايتتى، دەپ حابارلايدى  اقوردا.

«بيىل اباي قۇنانباي ۇلىنىڭ تۋعانىنا 180 جىل تولادى. مەن وسىدان بەس جىل بۇرىن ۇلى ويشىلدىڭ تۋعانىنا 175 جىل تولۋىنا وراي سەمەيدە ابايتانۋشى عالىمدارمەن كەزدەستىم، سول كەزدە اباي ينستيتۋتىن قۇرۋ تۋرالى ۇسىنىس ايتتىم. بۇگىندە بۇل باستاما سيفرلىق پلاتفورما فورماتىندا ىسكە اسىرىلدى، ياعني ءبىزدىڭ دياسپورالار مەن باسقا دا شەتەلدىكتەرگە قازاق ءتىلىن ۇيرەتۋ قۇرالى رەتىندە جۇمىس ىستەپ تۇر. ەندى وسى جوبانى تولىققاندى مادەني-اعارتۋ مەكەمەلەرىنە اينالدىرۋ قاجەت. بۇل قۇرىلىم كونفۋسيي، گەتە، سەرۆانتەس ينستيتۋتتارى سياقتى جۇمىس ىستەۋى كەرەك»، دەدى پرەزيدەنت.

مەملەكەت باسشىسى اباي ينستيتۋتى شەتەلدەردە دە اشىلۋى كەرەكتىگىن ايتتى.

«اباي ينستيتۋتى نەگىزگى سەرىكتەس ەلدەردىڭ بارىندە ءتول مادەنيەتىمىزدى ناسيحاتتايتىن ورتالىق بولۋعا ءتيىس. ءبىرقاتار ەلدە، مىسالى، جۇڭگو، تۇركيا، موڭعوليا جانە باسقا دا مەملەكەتتەردە وسىنداي ورتالىقتار اشىلاتىن بولدى. سىرتقى ىستەر مينيسترلىگى مەن «وتانداستار» قورىنا مادەنيەت جانە اقپارات مينيسترلىگىمەن بىرلەسىپ، شەتەلدە وسىنداي ورتالىقتار اشۋ ماسەلەسى بويىنشا ءتيىستى جۇمىستى جالعاستىرۋدى تاپسىرامىن.

حالىقارالىق «قازاق ءتىلى» قوعامى بەلسەنە اينالىسۋدا. بۇل ۇيىمنىڭ باستامالارىن ءبىز تۇتاس قوعام بولىپ ءارى قاراي قولداۋىمىز كەرەك.

مادەنيەت دەگەنىمىز – جاي عانا عيماراتتار مەن مەكەمەلەر ەمەس. بۇل – ۇلتتىق سانا-سەزىمدى جاھاندىق اۋقىمدا نىعايتا تۇسەتىن مىقتى تۇعىر»، دەدى پرەزيدەنت.