Lancaster Group اكسيونەرلەرى – بەرىك قانييەۆ، گاۋحار قاپپاروۆا جانە يۋريي پاك Qazaq Tili Endowment قورىنا 200 ملن تەڭگە ءبولۋ تۋرالى شەشىم قابىلدادى. بۇل – قازاق ءتىلىن قولداۋ قورىنا باعىتتالعان ەڭ قوماقتى ۇلەستىڭ ءبىرى.

«قازاق ءتىلى» قوعامىنىڭ ەنداۋمەنت قورى 2023 جىلى مەملەكەتتىك ءتىلدى دامىتۋ مەن قولداۋ ماقساتىندا جۇيەلى جانە تۇراقتى جۇمىسقا قاجەت قارجىلىق نەگىز قالىپتاستىرۋ ءۇشىن قۇرىلعان. ءبىرىنشى بولىپ بۇل باستامانى قازاقستان پرەزيدەنتى قاسىم-جومارت توقايەۆ قولداپ، 7 ملن تەڭگە كولەمىندە جارنا اۋدارعان ەدى. مەملەكەت باسشىسىنىڭ بۇل باستاماسىن بەلگىلى قازاقستاندىق كاسىپكەرلەر مەن قازاق ءتىلىنىڭ جاناشىرلارى جالعاستىردى.

ەنداۋمەنت قوردىڭ باستى ماقساتى – ەلىمىزدەگى مەملەكەتتىك ءتىلدى دامىتۋ جانە قولداۋ باعىتىندا جۇمىس ىستەيتىن ەڭ ءىرى قوعامدىق ۇيىم – «قازاق ءتىلى» قوعامىنىڭ تۇراقتى ءارى ۇزاقمەرزىمدى دامۋىن قامتاماسىز ەتۋ. ەنداۋمەنت قورىنىڭ ەرەكشەلىگى بار، وندا جينالعان قاراجاتتىڭ ءوزى جۇمسالمايدى. تەك قوردىڭ ينۆەستيسيالىق قىزمەتىنەن تۇسكەن تابىسى عانا «قازاق ءتىلى» قوعامىنىڭ جارعىلىق مىندەتتەرىن جۇزەگە اسىرۋعا جۇمسالادى. Qazaq Tili Endowment قورى تاۋەلسىز قامقورشىلار كەڭەسىنە باعىنادى. قامقورشىلار كەڭەسى قۇرامىندا بەدەلدى قوعام قايراتكەرلەرى، كاسىپكەرلەر مەن ءىرى دەمەۋشىلەر بار.

قوردىق جاريا ەسەبى مەن مەن دەمەۋشىلەر ءتىزىمى www.til.kz سايتىندا جاريالانادى. Lancaster Group اۋداراتىن قارجىعا دەيىن قور ەسەپشوتىندا 503 669 299 تەڭگە بولدى. «قازاق ءتىلى» قوعامىنىڭ پرەزيدەنتى راۋان كەنجەحان ۇلىنىڭ ايتۋىنشا، 2024 جىلى Qazaq Tili Endowment قورىنىڭ ۇستەمە تابىسى 75 ملن تەڭگەنى قۇرادى. وسى قاراجات ەسەبىنەن وتكەن جىلى 40-تان استام جوبا مەن ءىس-شارا جۇزەگە اسىرىلدى. ولاردىڭ قاتارىندا Oxford Qazaq Dictionary جوباسى، Disney، Pixar جانە Sony ستۋديالارى فيلمدەرىنىڭ دۋبلياج جۇمىسىن ناسيحاتتاۋ، كەڭىنەن تاراتۋ جانە ادىستەمەلىك قۇرالدار ازىرلەۋ، بالالارعا ارنالعان، ىسكەرلىك جانە عىلىمي-تانىمدىق كىتاپتاردى اۋدارۋ جانە باسىپ شىعارۋ، وزگە دە ماڭىزدى باستامالار بار.

Lancaster Group – قازاقستانداعى اسا ءىرى كوپسالالى حالىقارالىق حولدينگتىك كومپانيالاردىڭ ءبىرى. كومپانيا ءارتۇرلى سالالارعا ينۆەستيسيا سالادى، حالىقارالىق جەتەكشى وپەراتورلارمەن بىرلەسكەن كاسىپورىندار قۇرادى جانە ونەركاسىپتىك ينفراقۇرىلىم، مۇناي-گاز سەكتورى، جەر قويناۋىن پايدالانۋ، تاۋ-كەن ءوندىرىسى، فارماسيەۆتيكا، لوگيستيكا، باسقارۋ جانە ءبىلىم بەرۋ سالالارىندا جۇمىس ىستەيدى.