مەملەكەت باسشىسى قاسىم-جومارت كەمەل ۇلى توقايەۆ ەكونوميكالىق جانە الەۋمەتتىك دامۋدىڭ نەگىزگى باسىمدىعى رەتىندە ۋنيۆەرسيتەت عىلىمىن جانە ينفراقۇرىلىمىن دامىتۋ ماڭىزدىلىعىن ۇنەمى نازاردا ۇستاپ كەلەدى. وسىعان سايكەس، ءال-فارابي اتىنداعى قازاق ۇلتتىق ۋنيۆەرسيتەتىندە «Farabi Hub» يننوۆاسيالىق ونىمدەر مەن جوعارى تەحنولوگيالىق جوبالار ورتالىعى بوي كوتەردى. قازۇۋ-دىڭ 90 جىلدىق مەرەيتويى اياسىندا اشىلعان حابتىڭ ماقساتى – وزىق بىلىمگە، تەحنولوگيالار مەن رەسۋرستارعا قول جەتكىزۋدى قامتاماسىز ەتە وتىرىپ، عىلىمي ازىرلەمەلەر مەن تەحنولوگيالىق يدەيالاردى ناقتى ەكونوميكاعا ەنگىزۋدى جەدەلدەتۋ.
بۇل تۋرالى ءال-فارابي اتىنداعى قازۇۋ باسقارما توراعاسى-رەكتورى جانسەيىت تۇيمەبايەۆ ءال-فارابي اتىنداعى قازاق ۇلتتىق ۋنيۆەرسيتەتىندە الماتى قالاسىنىڭ اكىمدىگىمەن بىرلەسىپ ۇيىمداستىرىلعان «عىلىم، بيزنەس جانە ءوندىرىس ىقپالداستىعى» اتتى فورۋمدا ارنايى توقتالدى.
– «Farabi Hub» ۋنيۆەرسيتەتتەرمەن جانە عىلىمي ينستيتۋتتارمەن، سونداي-اق ينۆەستور كومپانيالارمەن ارىپتەستىك بايلانىس ورناتادى. بىرلەسكەن زەرتتەۋلەر جۇرگىزىلىپ، جاڭا تەحنولوگيالار ازىرلەنەدى. سوڭعى ۇلگىدەگى قۇرىلعىلارمەن جابدىقتالعان عىلىمي زەرتحانالار عىلىم مەن تەحنولوگيانىڭ ءارتۇرلى سالالارىندا زەرتتەۋلەر جۇرگىزىپ، تاجىريبە جاساۋعا مۇمكىندىك بەرەدى، – دەدى وقۋ ورنىنىڭ باسشىسى.
مۇندا ZTE، «ZooStan» ورتالىق ازيانى زەرتتەۋ جونىندەگى حالىقارالىق عىلىمي-زەرتتەۋ ورتالىعى، سولتۇستىك-باتىس پوليتەحنيكالىق ۋنيۆەرسيتەتىمەن بىرلەسكەن ميكروسپۋتنيكتەر زەرتحاناسى، بيولوگيا جانە بيوتەحنولوگيا زەرتحاناسى، حيميا جانە حيميالىق تەحنولوگيا زەرتحاناسى، زاماناۋي قولدانبالى فيزيكا جانە جوعارى تەحنولوگيالار زەرتحاناسى، «روبوتوتەحنيكا جانە مەحاترونيكا RoboMech» ءعىلىمي-بىلىم بەرۋ ورتالىعى، دارىلىك وسىمدىكتەردى عىلىمي-زەرتتەۋ ورتالىعى، سوت ساراپتامالارى ورتالىعى، عىلىمي-تەحنولوگيالىق پارك ورنالاسقان. «Farabi Hub» ورتالىعىنىڭ جالپى اۋدانى 5000 شارشى مەتردى قۇرايدى.
پىكىر قالدىرۋ