ۋاقىت – توقتاۋسىز وزەن. ءبىراق ادامزات تاريحىندا سارقىلماس ماڭگىلىك قۇندىلىقتار بار. ولار – ءبىلىم، پاراسات، مەيىرىم. وسى اسىل قاسيەتتەردى جۇرەگىنە تۇمار ەتكەن جان – ۇستاز. ال قانيپا ومارعالي قىزى – ۇستازدىڭ ۇستازى، ءبىلىمنىڭ شامشىراعى، رۋحتىڭ قايراتكەرى ەدى.
مەن قانيپا اپايدىڭ الدىندا بار بولعانى ەكى جىل عانا وقۋشى بولدىم. ءبىراق سول ەكى جىل – مەنىڭ بۇكىل عۇمىرىما ازىق بولعان تاعىلىم مەكتەبى. حان اپامدى ءاردايىم ماڭگىلىك ۇستازىم دەپ بىلەمىن، ونىڭ شاكىرتى بولعانىمدى ۇلكەن ماقتانىش سانايمىن.
قانيپا ومارعالي قىزى ءبىزدى تەك ادەبيەتكە باۋلىعان جوق، ءومىردىڭ ءوزىن ۇيرەتتى. ول بىزگە ابايدىڭ عاقلياسىن، ماعجاننىڭ اسقاق ارمانىن، مۇقاعاليدىڭ مۇڭىن، شەرحاننىڭ شىنشىلدىعىن سانامىزعا ءسىڭىردى. ونىڭ سىنىبىندا ءار شاكىرت ءوز ويىمەن دارالاندى، پىكىرىن اشىق ايتتى. قانيپا اپاي بىزگە: “شىندىقتى قورىقپاي سويلە. ەشقاشان جالتاقتاما. ادىلەتتىلىك ءۇشىن كۇرەسە ءبىل!” – دەپ ۇنەمى قايتالاپ وتىراتىن. بۇل سوزدەر مەن ءۇشىن ومىرلىك قاعيداعا اينالدى.
مەن ءوزىمدى قانيپا اپايدىڭ ەڭ سۇيىكتى شاكىرتىمىن دەپ ويلايتىنمىن. ءبىراق مەكتەپ بىتىرگەن سوڭ ءتۇسىندىم – ول ءاربىر شاكىرتىنە وسىنداي ەرەكشە سەزىم سىيلاي بىلگەن ەكەن. ونىڭ جۇرەگى تەڭدەي بولىنگەن شەكسىز ماحابباتقا تولى ەدى. ءارقايسىمىز ءوزىن ەرەكشە سەزىنىپ وستىك، ومىرلىك ازىق بولعان ۇلاعات الدىق. ءبىز – ونىڭ بالالارى ەدىك. ءبىز ءۇشىن قۋانىپ، ءبىز ءۇشىن الاڭدايتىن. ءبىز جەتىستىككە جەتسەك، بالاشا شاتتاناتىن، قاتەلىك جاساساق، جۇرەگى اۋىراتىن.
قانيپا اپايدىڭ ەڭ باستى قاسيەتى – ءوز ىسىنە دەگەن ادالدىعى ەدى.
ونىڭ اقىل-كەڭەسىن الۋعا تالاي مينيسترلەر مەن اكىمدەر كەلەتىن. ال بىزگە: “ولارمەن ويلارىڭدى بۇكپەي بولىسىڭدەر، تايسالماڭدار!” – دەپ اقىل ايتاتىن. سول سەبەپتى، بۇگىندە قانداي لاۋازىمدى ادامنىڭ الدىندا بولساق تا، ءوز ويىمىزدى اشىق ايتىپ، ارتىق جالباقتامايمىز. بۇل – تەك ماعان عانا ەمەس، قانيپا اپايدىڭ ءاربىر شاكىرتىنە سىڭىرگەن اسىل قاسيەتتەرىنىڭ ءبىرى.
قانيپا اپايدىڭ اماناتى – ادالدىقپەن قىزمەت ەتۋ، ءبىلىمنىڭ شىراعىن سوندىرمەۋ، ىزگىلىك پەن ۇلتتىق رۋحتى بيىك ۇستاۋ. بۇگىندە قاي سالادا جۇرسەك تە، ۇستازىمىزدان العان تاعىلىم – ءومىرىمىزدىڭ تەمىرقازىعى.
ۇلى ۇستازدىڭ مەيىرىمى دە، تاربيەلىك ءتاسىلى دە ەرەكشە ەدى.
“مىنا قۇلاقتان كۇن كورىنەدى!” – دەپ ەركەلەتكەندە، انامنىڭ مەيىرىمىنە بولەنگەندەي كۇي كەشەتىنمىن. ءقازىر بالام ەلحاننىڭ قۇلاعىنان كۇن كورىنگەندە، قانيپا ومارعالي قىزىنىڭ سول مەيىرىمىن ساعىنىشپەن ەسكە الامىن…
قانيپا بىتىبايەۆا – تەك ءبىلىمنىڭ عانا ەمەس، قازاق رۋحانياتىنىڭ شامشىراعى. ونىڭ ارتىندا قالعان ەڭبەكتەرى، جازعان كىتاپتارى، زەرتتەۋلەرى – ۇلتقا قىزمەت ەتەتىن باعا جەتپەس مۇرا.
قانيپا ومارعالي قىزى – ماڭگىلىك ۇستاز. ونىڭ ەسىمى، ەڭبەگى، شاكىرتتەرىنە بەرگەن شاپاعاتى ەشقاشان ۇمىتىلمايدى. ۇستازدىڭ الدىنان وتكەن ءاربىر تۇلەك – بولاشاققا جول نۇسقاعان شىراقشى. ەگەر ءبىز سول شىراقتى جاعا بىلسەك، ۇستازىمىزدىڭ ەڭبەگى ەش كەتپەگەنى.
ۇستازىمنىڭ رۋحىنا تاعزىم ەتىپ، ماڭگىلىك قۇرمەتپەن ەسكە الامىن!
ايتقازى جومارت ايتقازى ۇلى
استانا قالاسى اكىمى اپپاراتى باسشىسىنىڭ ورىنباسارى
