"بۋراباي" مەملەكەتتىك ۇلتتىق تابيعي پاركىنىڭ ماماندارى 2025 جىلدىڭ 14 ساۋىرىنەن باستاپ سپورتتىق-اۋەسقويلىق بالىق اۋلاۋعا ارنالعان جولدامالار قايتا ىسكە اسىرىلاتىن، الايدا ءبىرقاتار شەكتەۋلەر بار ەكەندىگىن مالىمدەدى.

تاراتىلعان مالىمەتكە سۇيەنسەك، بالىق اۋلاۋعا رۇقسات ەتىلگەن كولدەر: بۋراباي، كىشى شاباقتى، قاتاركول جانە تەكەكول.

الايدا، ءبىرقاتار تىيىمدار بار:

"ۇلتتىق پاركتىڭ سۋ ايدىندارىندا بالىقتاردىڭ ۋىلدىرىق شاشۋ ماۋسىمىنىڭ باستالۋىنا بايلانىستى جانە بيوارتۇرلىلىكتى ساقتاۋ ماقساتىندا كەلەسى تۇرلەرگە بالىق اۋلاۋ تىيىم سالىنادى: شورتان مەن كوكسەركە – 15 ساۋىردەن 15 مامىرعا دەيىن؛ تۇقى – 20 مامىر مەن 20 ماۋسىم ارالىعىندا"،- دەلىنگەن اقپاراتتا.

بۇل ەرەجەنى ساقتاماعاندارعا اكىمشىلىك كودەكستىڭ 383-بابى (بالىق اۋلاۋ جانە بالىق رەسۋرستارىن جانە باسقا دا سۋ جانۋارلارىن قورعاۋ قاعيدالارىن بۇزۋ) بويىنشا 10-100 اەك مولشەرىندە ايىپپۇل سالىنادى.