تالعار اۋدانىنداعى №33 مەكتەپ وسىدان جارتى عاسىر بۇرىن، 1966 جىلى سالىنعان. 460 وقۋشىعا ارنالعان وقۋ ورنىنا قازىرگى تاڭدا 1342 بالا بارىپ ءجۇر. الايدا مەكتەپ عيماراتىنىڭ ءىشى-سىرتى ابدەن ەسكىرگەن، ال سپورت ينفراقۇرىلىمى — مۇلدە نازاردان تىس قالعان.

مەكتەپكە جۋىردا جەرگىلىكتى كاسىپكەر ەلميرا رۋداكوۆا ارنايى كەلىپ، وقۋ ورنىنىڭ قازىرگى احۋالىمەن تانىستى. ونىڭ نازارىن ەڭ الدىمەن توزىعى جەتكەن سپورت الاڭدارى مەن ءقاۋىپ توندىرەتىن ەدەن جابىندارى اۋداردى. اتاپ ايتقاندا، فۋتبول قاقپاسىنىڭ تورلارى جىرتىلىپ، باسكەتبول ساقينالارى تورسىز كۇيدە تۇرعانىن، سپورت زالداعى جابدىقتار دا ءوز قىزمەتىن اتقارۋعا جارامايتىنىن كورىپ قايتقان بولاتىن.

بالالاردىڭ قاۋىپسىزدىگىنە الاڭداعان كاسىپكەر ناقتى كومەك كورسەتتى

مەكتەپتەگى جاعدايعا بەيجاي قاراماعان كاسىپكەر ءبىر سىنىپتىڭ ەدەنىن تولىقتاي جوندەپ بەردى. بۇعان دەيىنگى لينولەۋمنىڭ استىندا بورپىلداق قيىرشىق تاستار بولعان. ۇلكەن تەسىكتەر بالالاردىڭ ويناپ ءجۇرىپ، جاراقات الۋىنا سەبەپ بولۋى مۇمكىن ەدى. جوندەۋ جۇمىسى بارىسىندا ەدەننىڭ بەتى تەگىستەلىپ، ارنايى بەتون كونتاكت جاعىلىپ، ەكولوگيالىق جانە سۋعا ءتوزىمدى ۆينيل جابىندىسى توسەلدى. بۇل ماتەريالدى زەڭگە، شىرۋگە ۇشىرامايدى ءارى اۋاعا زياندى زات بولمەيدى دەيدى كاسىپكەر.

ايتا كەتەرلىگى، يگى ىسكە اۋداندىق ءماسليحات دەپۋتاتى الماس راسىلحان مۇرىندىق بولىپ، كاسىپكەردى كومەك كورسەتۋگە شاقىرعان. جوندەلگەن سىنىپپەن تانىسقان مەكتەپ ديرەكتورى ءامينا سماعۇلوۆا باسقا سىنىپتارداعى ەدەندەردىڭ دە جاعدايى ءماز ەمەس ەكەنىن ايتتى.

— ءبىز بالالاردىڭ قالادا وقىپ جۇرگەن زامانداستارىنان كەم تۇسپەۋىن قالايمىز. قولدان كەلگەنشە جاعدايدى جاقسارتۋعا تىرىسىپ جاتىرمىز. ءقازىر مەكتەپكە كۇردەلى جوندەۋ تەك ءۇش جىلدان كەيىن عانا جوسپارلانعان. سوڭعى كۇردەلى جوندەۋ جۇمىسى وسىدان ون جىل بۇرىن جاسالعان، — دەيدى مەكتەپ باسشىسى.

ۇستازدار ءوز قالتاسىنان اقشا شىعارىپ جاتىر

قازىرگى كەزدە مەكتەپ ۇجىمى جاعدايدى ءوز كۇشىمەن شەشۋگە تىرىسىپ وتىر. ءوز جالاقىسىنان اقشا شىعارىپ، جۇمىسشىلار جالداپ، سىنىپتارىن جوندەپ ءجۇرگەن ۇستازدار دا بارشىلىق. مىسالى، اعىلشىن ءتىلى ءپانىنىڭ ءمۇعالىمى اقمارال جۇمابەكوۆا ەدەن جوندەۋگە 110 مىڭ تەڭگە جۇمساعان. الايدا جۇمىس ساپاسى كوڭىلىنەن شىقپاپتى. سونىڭ سالدارىنان وقۋشىلار ءالى دە تەگىس ەمەس ەدەندە ءبىلىم الۋعا ءماجبۇر.

— بالالاردىڭ قاۋىپسىزدىگى مەن وقۋ جاعدايى ءبىز ءۇشىن ءبىرىنشى ورىندا. بۇل عيمارات قانشا جوندەلسە دە، تامىرىمەن شەشىلمەيىنشە ناتيجە بەرمەيدى. شىن مانىندە، بالالارعا جاڭا ءارى كەڭ مەكتەپ كەرەك، — دەيدى 22 جىلدان بەرى ەڭبەك ەتىپ كەلە جاتقان ۇستاز.

№33 مەكتەپتىڭ ماسەلەسى — جەكە ءبىر اۋىلدىڭ ەمەس، بۇكىل ەلدىڭ ورتاق پروبلەماسىنا اينالعان ءبىلىم سالاسىنىڭ كورىنىسى. اتا-انالار مەن ۇستازدار، كاسىپكەرلەر مەن جەرگىلىكتى بيلىك بىرلەسە قيمىلداعاندا عانا جاعداي جاقساراتىنى انىق. ءقازىر مەكتەپ باسشىلىعى قوسىمشا عيماراتتار سالۋ ءۇشىن ينۆەستورلار ىزدەستىرۋدە.

بۇل باستاما وزگە دە ازاماتتارعا ۇلگى بولسا يگى. ءار بالانىڭ ساپالى ءبىلىم الۋعا، ءقاۋىپسىز ورتادا وسۋگە تولىق قۇقىعى بار. ال بۇل قۇقىقتى قامتاماسىز ەتۋ — قوعامنىڭ ورتاق مىندەتى.