مادەنيەت جانە اقپارات ءمينيسترى ايدا بالايەۆا تاريحي-مادەني مۇرالاردى ساقتاۋعا جەرگىلىكتى بيلىك قۇلىق تانىتپاي وتىرعانىن سىنعا الدى.
— ءبىز ءوز تاراپىمىزدان جەرگىلىكتى اكىمدىكتەرگە بىرنەشە رەت حات جولداپ، تاريحي-مادەني مۇرالارىمىزدى ساقتاۋعا قاتىستى ۇسىنىستارىمىزدى جىبەردىك. الايدا كەيبىر جەرگىلىكتى اتقارۋشى ورگاندار بۇل ماسەلەگە ءجىتى نازار اۋدارماي وتىر. وسى ورايدا، مينيسترلىك جۇيەلى شارالاردى قامتيتىن 3 باعىتتاعى جوسپار جوباسىن جاساپ، مەملەكەتتىك ورگاندارمەن كەلىسىپ، ۇكىمەت قاراۋىنا ۇسىنۋعا دايىن، — دەدى مادەنيەت ءمينيسترى ۇكىمەتتىڭ بۇگىنگى وتىرىسىندا.
بۇل جوسپار جەرگىلىكتى ءارى حالىقارالىق دەڭگەيدە ءارتۇرلى جۇمىستاردى ۇيىمداستىرۋعا نەگىزدەلگەن. ونداعى ءبىرىنشى باعىت — يۋنەسكو قورعاۋىنداعى ەسكەرتكىشتەرمەن كەشەندى جۇمىس جۇرگىزۋ. بۇل باعىتتا باسىم ماسەلەلەر قاتارىنا يۋنەسكو ستاندارتتارىن ساقتاۋ، قورعالاتىن جانە زاماناۋي بۋفەرلىك ايماقتاردى مونيتورينگىلەۋ تەحنولوگيالارىن ەنگىزۋ، بۇكىلالەمدىك مۇرا تىزىمىندەگى 3 نوميناسيانى (10 ەسكەرتكىش) باسقارۋدىڭ مەنەدجمەنت-جوسپارىن ازىرلەۋ بار.
— پرەزيدەنت تاپسىرماسىنا سايكەس، 2025 جىلدىڭ قاڭتارىندا يۋنەسكو قاراۋىنا ەكى نوميناسيالىق قۇجات جولداندى. ولار — «ماڭعىستاۋ جەراستى مەشىتتەرى» جانە قىرعىزستان، تاجىكستان، وزبەكستانمەن بىرلەسىپ دايىندالعان «جىبەك جولى. فەرعانا-سىرداريا ءدالىزى» ترانسۇلتتىق نوميناسياسى. حالىقارالىق رەگلامەنتتەردى ەسكەرە وتىرىپ، 2026 جىلى يۋنەسكو تىزىمىنە 11 جاڭا قازاقستاندىق ەسكەرتكىشتى ەنگىزۋ ماقساتىندا ءتيىستى جۇمىستار ءجۇرىپ جاتىر، — دەدى ا. بالايەۆا.
جاقىندا عانا «بەتاشار» ءراسىمىنىڭ مادەني ماڭىزدىلىعى حالىقارالىق دەڭگەيدە تانىلدى. تاياۋدا «سالبۋرىن» مەن «الپامىس باتىر» نوميناسيالارى بويىنشا قۇجاتتار ازىرلەنىپ، يۋنەسكو قاراۋىنا ۇسىنىلدى.
وعان قوسا، قىزىلورداداعى 3 تاريحي-مادەني نىسان يۋنەسكو تىزىمىنە ەنۋى مۇمكىن.
بۇعان دەيىن مادەنيەت ءمينيسترى قوجا احمەت ياساۋي كەسەنەسى ماڭىندا كەلىسىلمەگەن قۇرىلىس توقتاماي تۇرعانىن ايتقان ەدى.
