قازاقستاندا جوشى حان مەن التىن وردانىڭ قۇرىلۋىنا ارنالعان «التىن يمپەريا» تاريحي سەريالىنىڭ ءتۇسىرىلىم كەزەڭى رەسمي تۇردە اياقتالدى. جوبا 2025 جىلدىڭ 14 اقپانىندا باستالىپ، 11،5 اپتاعا سوزىلدى. بارلىق ءتۇسىرىلىم قازاقستان اۋماعىندا ءوتتى: «قازاقفيلم» ستۋدياسىنان باستاپ كوشپەندىلەر قالاسى مەن تامعالى تاس پەتروگليفتەرىنە دەيىن.

سەريالدى Netflix-تە تانىمال بولعان Karga Seven Pictures ستۋدياسى ءتۇسىرىپ جاتىر. رەجيسسەرى – ەمرە ساحين، سەناريي اۆتورلارى قاتارىندا «ۆيكينگتەر» جوباسىنا قاتىسقان تاريحشى دجاستين پوللارد بار.

تۋىندى تاريحي دالدىككە ەرەكشە ءمان بەرىپ، التىن وردا تاريحىن زەرتتەگەن حالىقارالىق ساراپشىلاردىڭ قاتىسۋىمەن جاسالدى. تۇسىرىلىمگە 700-گە جۋىق ادام قاتىستى، ولاردىڭ 70%-ى قازاقستاندىق ماماندار.

سەريالدىڭ كورىنىستەرىندە وتاندىق Nomad Stunts توبى دايىنداعان ءىرى شايقاستار مەن جەكپە-جەك حورەوگرافيالارى ەرەكشە ورىن الادى. اكتەرلىك قۇرامعا 350 ادام ىرىكتەلىپ الىنعان، ونىڭ ىشىندە قازاقستاندىق ارتىستەردىڭ ويىنى جوعارى باعالاندى.

جوبا ءقازىر پوست-پروداكشن كەزەڭىنە ءوتتى – مونتاج، دىبىس پەن ۆيزۋالدى ەففەكتىلەر جاساۋ جۇمىستارى جۇرگىزىلۋدە. سەريال حالىقارالىق اۋديتورياعا ۇسىنىلاتىن قازاقستان تاريحىنداعى ەڭ اۋقىمدى تاريحي جوبالاردىڭ ءبىرى بولماق.