استانادا قازاقستاندا العاشقى اتوم ەلەكتر ستانسياسىن (اەس) سالۋعا ارنالعان ورىن تاڭداۋ بويىنشا بەس كۇندىك حالىقارالىق سەمينار باستالدى. شاراعا حالىقارالىق اتوم ەنەرگياسى اگەنتتىگى (ماگاتە) وكىلدەرىمەن قاتار، ەنەرگەتيكا مينيسترلىگى، ەكولوگيا جانە تابيعي رەسۋرستار مينيسترلىگى، اتوم ەنەرگەتيكاسى جونىندەگى اگەنتتىك جانە «قازاقستان اتوم ەلەكتر ستانسيالارى» ج ش س ماماندارى قاتىسۋدا.
سەمينار بارىسىندا اەس قۇرىلىسىنا قولايلى ورىنداردى انىقتاۋدا قولدانىلاتىن ماگاتە ۇسىنعان حالىقارالىق ستاندارتتار مەن ءادىسنامالار جان-جاقتى تالقىلانباق.
«قازاقستان اتوم ەلەكتر ستانسيالارى» ج ش س باس ديرەكتورىنىڭ ورىنباسارى رينات وقاسوۆتىڭ ايتۋىنشا، قازىرگى تاڭدا الماتى وبلىسى جامبىل اۋدانىنا قاراستى ۇلكەن كەنتىنىڭ اۋماعى نەگىزگى نۇسقا رەتىندە قاراستىرىلىپ وتىر. سەمينار اياسىندا وسى ءوڭىردىڭ ناقتى قاي تۇسى اەس قۇرىلىسىنا ەڭ قولايلى ەكەنىن عىلىمي نەگىزدە تالداۋ جوسپارلانعان.
— ءبىز ماگاتە ماماندارىن قازاقستانعا شاقىرىپ، جەرگىلىكتى انتروپوگەندىك، تەحنوگەندىك جانە تابيعي فاكتورلاردى ەسكەرە وتىرىپ، ورىن تاڭداۋعا قاتىستى تاجىريبەسىمەن ءبولىسۋدى سۇرادىق. بۇل ءبىلىم اەس قۇرىلىسىنا لايىقتى ورىندى ناقتى انىقتاۋعا كومەكتەسەدى، — دەدى رينات وقاسوۆ.
ونىڭ سوزىنشە، ۇلكەن كەنت پەن كۋرچاتوۆ قالاسى بىرنەشە جىل بويى زەرتتەلىپ كەلەدى. ءقازىر بۇل زەرتتەۋلەر تەرەڭدەتىلىپ، ينجەنەرلىك-تەحنيكالىق ساراپتامالار، سەيسميكالىق بەلسەندىلىك، كليماتتىق جاعداي، توپىراق پەن سۋ قۇرامىنىڭ ەرەكشەلىكتەرى جانە الەۋمەتتىك-ەكونوميكالىق اسپەكتىلەر ەگجەي-تەگجەيلى تالدانۋدا.
سەميناردىڭ اشىلۋىندا ءسوز سويلەگەن اتوم ەنەرگەتيكاسى جونىندەگى اگەنتتىك ءتوراعاسىنىڭ ورىنباسارى اسەت ماحامبەتوۆ پەن ماگاتە ساراپشىلار توبىنىڭ جەتەكشىسى لي حەن ۋ يادرولىق قاۋىپسىزدىك پەن اشىقتىقتىڭ ماڭىزدىلىعىنا نازار اۋداردى.
— قازاقستان يادرولىق قاۋىپسىزدىك، قورعانىس جانە اشىقتىق ماسەلەلەرىن باستى نازاردا ۇستايدى. ءبىز ماگاتە ستاندارتتارى مەن ۇزدىك حالىقارالىق تاجىريبەلەردى تولىق ساقتاۋعا نيەتتىمىز، — دەدى اسەت ماحامبەتوۆ.
بۇل سەمينار اەس قۇرىلىسىنا قاتىستى قابىلداناتىن شەشىمدەردىڭ عىلىمي جانە حالىقارالىق تالاپتارعا ساي بولۋىن قامتاماسىز ەتۋگە باعىتتالعان ماڭىزدى قادام بولىپ سانالادى.
