بۇگىن ۇلتتىق كىتاپحانادا رەسپۋبليكالىق بالالار مەن جاسوسپىرىمدەرگە ارنالعان «ۇلان» گازەتىنىڭ 95 جىلدىعىنا وراي مەرەكەلىك ءىس-شارا ءوتتى. قازاق ءباسپاسوزىنىڭ رۋحاني اۋلەتى، قارا شاڭىراعى بولعان اتالمىش گازەت كۇنى بۇگىنگە دەيىن تالاي بالانىڭ شىعارماشىلىعىن شىڭداپ، جازارمان تۇلعا رەتىندە بەيىمدەپ كەلەدى. بۇل – بىرنەشە بۋىننىڭ بالالىق شاعىنىڭ بولشەگىنە اينالعان، ەلىمىزدىڭ رۋحاني تاريحىندا تەرەڭ ءىزى بار باسىلىمنىڭ تاعىلىمدى مەرەكەسى بولدى.

  بيىل 95 جىلدىق مەجەنى ەڭسەرگەن «ۇلان» – بىرنەشە بۋىننىڭ جۇرەگىنەن ورىن العان، جاس ۇرپاققا باعىت-باعدار كورسەتىپ كەلە جاتقان رۋحاني اۋلەت. سالتاناتتى ءىس-شارادا باسىلىمنىڭ جاس ورەندەردىڭ سانا-سەزىمىنە ۇلتتىق قۇندىلىقتى سىڭىرۋدەگى، ولاردىڭ ءوي-ورىسىن دامىتۋ مەن شىعارماشىلىققا باۋلۋداعى ءرولى ەرەكشە اتالدى. گازەت ۇجىمىنىڭ بالالار تاربيەسىنە قوسقان ۇلەسى مەن جۇيەلى جۇمىسى ەل ەرتەڭىنە سالىنعان بەرىك ىرگەتاس رەتىندە باعالانىپ، رەداكسيا ۇجىمىنا اقجارما تىلەكتەر ارنالدى.

  قاتىسۋشىلار نازارىنا «ۇلان گازەتىنىڭ تاريحىنان سىر شەرتەتىن – ۇلاعاتتى ۇرپاق» اتتى فوتوكورمە ۇسىنىلدى. وندا گازەتتىڭ ءار كەزەڭىن بەينەلەيتىن 500-دەن استام مۇراعات سۋرەت، بۇرىنعى رەداكتورلار مەن اۆتورلاردىڭ ەستەلىگى قويىلدى. بۇعان قوسا، وقۋشىلار مەن قوناقتار ارنايى دايىندالعان فوتوجاشىكتە ەستەلىك سۋرەتكە ءتۇسىپ، گازەتپەن بايلانىستى ءوز ەستەلىكتەرىن ەسكە الدى. بۇل – تەك كورمە ەمەس، ءبىر ءداۋىردىڭ رۋحاني ايناسى ىسپەتتى مازمۇندى الاڭ بولدى.

  سونداي-اق الماتىداعى فيزيكا- ماتەماتيكا باعىتىنداعى نازاربايەۆ زياتكەرلىك مەكتەبىنىڭ وقۋشىلارى ۇسىنعان روبوتوتەحنيكا كورمەسى ەرەكشە اسەر قالدىردى. Cristabol كومانداسى اقش-تىڭ حيۋستون قالاسىندا وتكەن، 110 ەلدەن 50 مىڭنان اسا وقۋشى قاتىسقان حالىقارالىق First Championship 2025 ينجەنەرلىك تۋرنيرىندە جۇلدەلى 3-ورىن العان بولاتىن. ولاردىڭ جوبالارى كورمەگە كەلگەن بالالار مەن اتا-انالار تاراپىنان ۇلكەن قىزىعۋشىلىق تۋدىردى.

  مەرەكەلىك كونسەرتتىك باعدارلاما دا كەڭ اۋقىمدا ۇيىمداستىرىلدى. احمەت جۇبانوۆ اتىنداعى مۋزىكا مەكتەبىنىڭ ءانسامبلى، «ياپۋراي» حالىق ءانىن ورىنداعان وقۋشىلار، اباي اتىنداعى مەكتەپتىڭ ايتىسكەرلەر توبى، TEDx فورماتىندا ءسوز سويلەگەن جاس سپيكەرلەر كوپشىلىكتى ءتانتى ەتتى. سونداي-اق «قۇستار ءانى» جانە «حالىق مەرەكەسى» شىعارمالارى شىرقالىپ، وقۋشىلار مەن قوناقتار شىعارماشىلىق شابىت الدى.

  مەرەيتوي اياسىندا وقۋشىلار اراسىندا ۇيىمداستىرىلعان شىعارماشىلىق بايقاۋ دا قورىتىندىلاندى. «ۇلان» گازەتى مەن زەينوللا سانىك قورىنىڭ قولداۋىمەن بيىل ەكىنشى رەت وتكىزىلگەن «تاستۇلەك» شىعارماشىلىق بايقاۋىنىڭ جەڭىمپازدارى ماراپاتتالىپ، ولارعا ارنايى اقشالاي سىيلىقتار تابىستالدى. بۇل – بالانىڭ قابىلەتىن باعالاۋعا، تالپىنىسىن قاناتتاندىرۋعا باعىتتالعان تاماشا باستاما رەتىندە تانىلدى.

  «ۇلان» گازەتىنىڭ 95 جىلدىعى – جاي عانا ءبىر باسىلىمنىڭ مەرەيتويى ەمەس، بۇل تۇتاس قازاق رۋحانياتىنىڭ بالالىق شاعىمەن قايتا قاۋىشقان ءساتى. «ۇلان» – ۇلت بولاشاعىنىڭ ءۇنى، ويلى ورەننىڭ سەرىگى، ارمانشىل جۇرەكتىڭ سەنىمدى سىرلاسى. بۇگىنگى ۇرپاققا، ەرتەڭگى كوشباسشىلارعا شابىت سىيلايتىن رۋحاني مەكتەپ رەتىندەگى ءرولى ايرىقشا. زيالى قاۋىم وكىلدەرى، ۇستازدار، مەكتەپ وقۋشىلارى، «ۇلاننىڭ» جاس تىلشىلەرى مەن بەلسەندى اۆتورلار قاتىسقان بۇل كەش ەستەن كەتپەس رۋحاني كۇنگە اينالدى. بۇگىنگى مەرەيتوي بولاشاقتا ولاردىڭ شىعارماشىلىق جولىنا باعىت-باعدار بەرەدى دەگەن سەنىم مول.