«وتباسى بانك» ديرەكتورلار كەڭەسىنىڭ تاۋەلسىز مۇشەسى ەلميرا ەرمەكوۆا تەلەفون الاياقتارىنىڭ ارباۋىنا ءتۇسىپ، دەپوزيتىندەگى اقشاسىن ءوز قولىمەن بەيتانىس ادامدارعا بەرىپ جىبەرگەن. جۋرناليست ميحايل كوزاچكوۆتىڭ جازۋىنشا، ەرمەكوۆاعا ءوزىن بانك ءتورايىمى ءلاززات يبراگيموۆا دەپ تانىستىرعان ادام حابارلاما جىبەرىپ، ارتىنشا «ارنايى قىزمەت» اتىنان ەر ادام بەينەقوڭىراۋ شالىپ، ءقاۋىپ ءتونىپ تۇرعانىن ايتىپ سەندىرگەن.

الاياقتار مەملەكەتتىك ورگان كەڭسەسىندەگىدەي كورىنىس جاساپ (ەلتاڭبا مەن پرەزيدەنت پورترەتى بار كەڭسە فونى)، ەرمەكوۆانى الداپ سوققان. ولاردىڭ ءبىرى ءوزىن ۇلتتىق بانك قىزمەتكەرىمىن دەپ تانىستىرىپ، جالعان كۋالىك تە جولداعان.

ناتيجەسىندە، ەرمەكوۆا ءبىر بانكتەگى دەپوزيتتەگى اقشاسىن شەشىپ الىپ، بەلگىلەنگەن ادامعا – «باراكۋدا» كود ءسوزىن ايتقان جىگىتكە پاكەتپەن تابىستاعان. ەكىنشى بانكتەگى دەپوزيتىن دە شەشپەك بولعاندا، بانك قىزمەتكەرلەرى كۇدىكتەنىپ، ونى توقتاتقان.

سوڭىندا ەرمەكوۆا پوليسياعا جۇگىنىپ، كۇدىكتىلەر قولعا ءتۇستى. 21 جاستاعى احماد مۇحيدين ۇلى مەن 31 جاستاعى داستان بەكبوتايەۆ الاياقتىق جاساعانى ءۇشىن كىنالى دەپ تانىلىپ، 5 جىلعا باس بوستاندىعىنان ايىرىلدى. الايدا شەتەلدەن ارەكەت ەتكەن نەگىزگى ۇيىمداستىرۋشىلار تابىلعان جوق.