قىزىلوردا. قازاقپارات - سىرداريا وزەنىنىڭ سول جاعالاۋىنداعى بىرلىك اۋىلىندا جاڭا مەشىت حالىق يگىلىگىنە پايدالانۋعا بەرىلدى، دەپ حابارلادى قازالى اۋداندىق اكىمدىگىنىڭ باسپا ءسوز قىزمەتىنەن.
«رامبەردى يشان» مەشىتىنىڭ اشىلۋ سالتاناتىندا ءسوز سويلەگەن اۋدان اكىمى ناجمادين شامۇراتوۆ: «قاسيەتتى جۇما كۇنىندە اشىلعان جاڭا مەشىتتىڭ ىنتىماق پەن رۋحاني دوستىققا شاقىراتىن ورىنعا، يماندىلىق جولىنداعى رۋحاني ءبىلىم وشاعىنا اينالۋىنا تىلەكشىمىز. «تالاپ - پەندەدەن، قولداۋ - تاڭىردەن» دەيدى دانا حالقىمىز. تالاپتى ازاماتتارىمىزدىڭ ىزگى ىستەرى وڭعا باسىپ، قۇلشىلىق ەتكەن ءاربىر ادامنىڭ ىستىق-ىقىلاسى اللادان قولداۋ تاپسىن»، - دەپ حالىقتى كوپتەن كۇتكەن قۋانىشپەن قۇتتىقتادى. 

تاۋەلسىزدىك العان جىلدارى قىزىلوردا وبلىسىندا 23 عانا مەشىت بولسا، قازىرگى تاڭدا ولاردىڭ سانى 155-كە جەتتى. بۇل ايماقتاعى الەۋمەتتىك-ەكونوميكالىق دامۋىمەن قاتار رۋحاني قۇندىلىقتارىمىزدىڭ دا جاندانعانىن بىلدىرسە كەرەك. 

ال اۋدان بويىنشا 24 مەشىت حالىق يگىلىگى ءۇشىن جۇمىس جاسايدى. سونىڭ نەگىزىندە ءدىني ساۋاتى بار ازاماتتار سانى ارتىپ كەلەدى. جاستار يسلام دىنىنە دەن قويىپ، يماندىلىق پەن ادامگەرشىلىك قاسيەتتەردى بويلارىنا سىڭىرۋدە. وتكەن ايدىڭ وزىندە ەكى اۋىلدا (ق.ءپىرىموۆ، اقتان باتىر اۋىلدارى) جاڭا مەشىت پايدالانۋعا بەرىلدى. بۇگىن ولاردىڭ قاتارى تاعى ءبىر مەشىتكە كوبەيدى.

مەشىتكە اتى بەرىلگەن رامبەردى يشان بۇحارا، سامارقاندا ءدىني وقۋ ورىندارىنان ءدارىس العان ەمشى ءارى اۋليە كىسى بولعان. 1896 جىلى وسى بىرلىك اۋىلىنا كەلىپ، العاش رەت اللانىڭ جەردەگى ءۇيى - مەشىتتى سالىپ، حالىقتى يماندىلىققا شاقىرعان. ال كەيىن 1998 جىلى ازاماتتاردىڭ قولداۋىمەن ازىق-تۇلىك دۇكەنى مەشىت عيماراتىنا بەرىلىپ، «رامبەردى يشان» مەشىتىن اشىلعان بولاتىن. ودان بەرى 20 جىلعا جۋىق ۋاقىت ءوتىپ، ءماسليحات دەپۋتاتى، كاسىپكەر بەكقالي بەكباۋىلوۆ مەشىت قۇرىلىسىن جۇرگىزۋدى قولعا العان. اۋىل تۇرعىندارى جومارت جانعا العىس ءبىلدىرىپ، سىي-قۇرمەت كورسەتتى. 
مۇنان سوڭ جۇرتشىلىق ارنايى استان ءدام تاتىپ تارقاستى. ونەرپازدار جىردان شاشۋ شاشسا، جاستار ءتۇرلى سپورتتان جارىسقا ءتۇستى.

دەرەككوز. قازاقپارات