قازاقستاندا ورناتىلعان بەينەباقىلاۋ كامەرالارىنىڭ كومەگىمەن 5 مىڭ قىلمىستىق ءىس پەن 317 مىڭنان استام اكىمشىلىك قۇقىق بۇزۋشىلىق انىقتالدى. بۇل تۋرالى پرەمەر-مينيستر ولجاس بەكتەنوۆ سەنات دەپۋتاتتارىنىڭ ساۋالىنا بەرگەن جاۋابىندا مالىمدەدى.
ۇكىمەت باسشىسىنىڭ ايتۋىنشا، ىشكى ىستەر مينيسترلىگى قۇقىق بۇزۋشىلىقتىڭ الدىن الۋ ماقساتىندا سيفرلىق تەحنولوگيالاردى كەڭىنەن قولدانىپ كەلەدى. اتاپ ايتقاندا، «جەدەل باسقارۋ ورتالىقتارىنا شىعارا وتىرىپ ەلدى مەكەندەردى جاپپاي بەينەباقىلاۋ جۇيەلەرىمەن قامتۋ» جوباسى اياسىندا 100 تۇرعىنعا شاققاندا 15 بەينەكامەرا ورناتۋ كوزدەلىپ وتىر. بۇل كورسەتكىش بويىنشا ەلىمىزدە شامامەن 3 ميلليون كامەرا قاجەت بولادى.
قازىرگى تاڭدا قوعامدىق ورىندار مەن كوشەلەردە 1،4 ميلليون بەينەكامەرا جۇمىس ىستەپ تۇر، ونىڭ ىشىندە 386 مىڭى ىشكى ىستەر ورگاندارىنىڭ جەدەل باسقارۋ ورتالىقتارىنا جانە كەزەكشى بولىمدەرگە قوسىلعان.
سونىمەن قاتار، بەت-الپەتتى تانۋ فۋنكسياسى بار 19 مىڭ كامەرا سىناقتان وتكىزىلۋدە. وسى جۇيەنىڭ كومەگىمەن 569 كۇدىكتى انىقتالىپ، ۇستالعان. حالىق كوپ جينالاتىن ورىنداردا بەينەكامەرالارمەن قاتار، داۋىس زورايتقىش، ميكروفون جانە پوليسياعا تىكەلەي بايلانىس ورناتۋعا ارنالعان «SOS» تۇيمەلەرى دە ورناتىلۋدا.
پرەمەر-مينيستردىڭ سوزىنشە، بەينەباقىلاۋ ينفراقۇرىلىمىن دامىتۋ جانە كامەرا سانىن ارتتىرۋ جۇمىستارى تۇراقتى باقىلاۋدا.
ايتا كەتەيىك، بۇعان دەيىن سەناتور گەنناديي شيپوۆسكيح ەلدەگى بۇزاقىلىق فاكتىلەرىنىڭ، اسىرەسە مەكتەپتەر مەن كوشەلەردە، كوبەيىپ بارا جاتقانىنا الاڭداۋشىلىق ءبىلدىرىپ، ۇكىمەتكە دەپۋتاتتىق ساۋال جولداعان ەدى. وسىعان بايلانىستى، ۇكىمەت باسشىسى 2025 جىلدىڭ 1 قىركۇيەگىنەن باستاپ ۇساق بۇزاقىلىق ءۇشىن جازا كۇشەيتىلەتىنىن حابارلادى.
