الماتى. قازاقپارات - بۇگىن الماتىدا «نەمىس ينۆەستيسياسىنىڭ قازاقستانعا كەلۋى - مۇمكىندىكتەر مەن كەدەرگىلەر» تاقىرىبىندا 17ء-شى گەرمانيا ەكونوميكاسىنىڭ كۇنى باستالدى.
وسى شارا اياسىندا ۇيىمداستىرىلعان حالىقارالىق كونفەرەنسياعا الماتى قالاسىنىڭ اكىمى باۋىرجان بايبەك، ق ر ينۆەستيسيالار جانە دامۋ ۆيسە-مينيسترى البەرت راۋ، گەرمانيا فەدەراتيۆتىك رەسپۋبليكاسى پارلامەتىنىڭ دەپۋتاتى حارتمۋت كوشىك، قازاقستان مەن گەرمانيا اراسىنداعى بىرلەسكەن كاسىپورىنداردىڭ باسشىلارى جانە باسقا دا مۇددەلى تۇلعالار قاتىستى.

ءوز سوزىندە الماتى قالاسىنىڭ اكىمى باۋىرجان بايبەك كەزىندە ءوزىنىڭ گەرمانيادا وقىعاندىعىن، سوندىقتان وسى ەلدەن كەلگەن قوناقتارمەن كەزدەسكەنىنە قۋانىشتى ەكەندىگىن ءبىلدىرىپ، وسى مۇمكىنشىلىكتى پايدالانىپ بايانداماسىنىڭ ءبىر بولىگىن نەمىس تىلىندە وقىدى.

«قازاقستان مەن گەرمانيا اراسىنداعى ساۋدا-ەكونوميكالىق بايلانىس بۇگىندە نىعايىپ كەلەدى. بۇل جەردە الماتى قالاسىنىڭ الار ورنى ەرەكشە. الماتى مەن گەرمانيا اراسىنداعى ىنتىماقتاستىق جوعارى قارقىنمەن دامىپ جاتىر. بۇگىنگى تاڭدا الماتىدا 195  بىرلەسكەن كاسىپورىن جانە نەمىس كاپيتالىنىڭ قاتىسۋىمەن 200 كاسىپورىن تابىستى  جۇمىس ىستەپ كەلەدى. ياعني، قازاقستاندا ەكى ەل كاپيتالىنىڭ بىرلەسۋىمەن قۇرىلعان كومپانيالاردىڭ 60 پايىزى الماتىدا شوعىرلانعان. بۇل قۋانارلىق جاعداي. بۇل قارىم-قاتىناستىڭ الداعى ۋاقىتتا دا دامي تۇسەتىندىگىنە جانە گەرمانيالىق ينۆەستورلاردىڭ الماتىدا ەكونوميكانىڭ باسىمدى باعىتتارى بويىنشا قولعا الىناتىن ءىرى جوبالارعا بەلسەندى تۇردە قاتىساتىندىعىنا سەنىمىمىز مول»، - دەدى ب. بايبەك.

بۇگىنگى كونفەرەنسيا بارىسىندا ەكى جاقتى ىنتىماقتاستىقتى جاقسارتۋ مۇمكىندىكتەرى جانە بولاشاق جوبالاردى قولعا الۋ ماسەلەلەرى تالقىلاندى.

ايتا كەتەلىك، قازىرگى تاڭدا قازاقستاندا بارلىعى 350-دەن استام نەمىس كاسىپورنى قىزمەت اتقارادى. ولار ينفراقۇرىلىمداردى دامىتۋ، ساۋدا، قۇرىلىس جانە باسقا دا سالالاردا جەمىستى ەڭبەك ەتىپ كەلەدى.

كونفەرەنسيا جۇمىسى ودان ءارى جالعاسۋدا.

دەرەككوز. قازاقپارات