الماتى. قازاقپارات - الماتى دەنساۋلىق ساقتاۋ جانە ءبىلىم بەرۋ ۇيىمدارى حالىق الدىندا جاريا ەسەپ بەرەتىن بولدى. مۇنداي تالاپتى قالا اكىمى، ءارى «نۇر وتان» پارتياسى قالالىق فيليالىنىڭ ءتوراعاسى باۋىرجان بايبەك بۇگىن وتكەن ساياسي كەڭەس بيۋروسىنىڭ وتىرىسىندا قويدى. 
اكىمنىڭ ايتۋىنشا، دەنساۋلىق ساقتاۋ مەن ءبىلىم بەرۋ سالالارىندا جەمقورلىققا قاتىستى قالا تۇرعىندارىنىڭ نارازىلىعى وتە جوعارى. 

«وسى ەكى سالا بويىنشا حالىقتىڭ نارازىلىعى كوپ. باس دارىگەرلەرگە كىرۋ مەنىڭ كابينەتىمە كىرگەننەن دە قيىن. ەشقانداي قولداۋسىز اۋرۋحانالارعا ءتۇسۋدىڭ ءوزى قورقىنىشتى. مەكتەپ ديرەكتورلارى دا جاعىمپاز اتا-انالاردىڭ قولىمەن اقشا جيناۋىن جالعاستىرىپ جاتىر. اتا-نالار بىردەڭە ايتۋدان قورقادى»، - دەدى قالا اكىمى. 

اكىمنىڭ ورىنباسارى زاۋرەش امانجولوۆانىڭ ايتۋىنشا، 1 قازان مەن 1 قاراشا ارالىعىندا بارلىق ءبىلىم بەرۋ مەكەمەلەرىندە قوسىمشا اقشا جيناۋعا قارسى اكسيا وتەدى. 

وسىنداي قۇقىقبۇزۋشىلىققا جول بەرگەنى ءۇشىن جاقىندا №60 مەكتەپ-گيمنازياسىنىڭ ديرەكتورى قىزمەتىنەن ايرىلعان. 

«بۇل ەكى سالاعا حالىقتىڭ سىنى زور. تالابى قاتتى. ويتكەنى، بۇل سالالاردىڭ حالىققا بەرەرى كوپ. بيىل ءىس جۇزىندە جۇمىس جاسامايتىن مۇعالىمدەر ءۇشىن اقشا الىپ وتىرعان 5 مەكتەپ ديرەكتورى قىلمىستىق جاۋاپكەرشىلىككە تارتىلدى. ولار №6، №146، №172، №184، №105 مەكتەپ ديرەكتورلارى. سونداي-اق الاتاۋ اۋداندىق ءبىلىم ءبولىمىنىڭ باسشىسى دا بار. دەنساۋلىق ساقتاۋ سالاسىنا كەلسەك، باقىلاۋ ورگاندارىمەن 5 باسشى قىزمەتىنەن الىندى. ونىڭ ەكەۋى بويىنشا ءالى قىلمىستىق تەرگەۋ جالعاسىپ جاتىر. ادامدار كوبىنە تىركەۋ ءبولىمىنىڭ جۇمىسىنا، دارىگەردىڭ قابىلداۋىن ۇزاق كۇتۋگە تۋرا كەلەتىندىگىنە نارازىلىق ءبىلدىرىپ وتىر»، - دەدى زاۋرەش امانجولوۆا. 

قالا اكىمىنىڭ ورىنباسارى زاۋرەش امانجولوۆانىڭ بايانداماسىنان سوڭ مەملەكەتتىك مەكەمەلەردە كىرىس جانە شىعىس ەسەبى تۋرالى جاڭا تالاپ ەنگىزىلدى. ەندى ءار ەمحانانىڭ باس دارىگەرى، مەكتەپ ديرەكتورى، بالاباقشا مەڭگەرۋشىسى تۇرعىندار مەن اتا-انالار الدىندا ەسەپ بەرۋگە مىندەتتەلەدى. 

قالا اكىمى ايتقانداي، الماتىلىقتار وسى قۇرىلىمدارعا بيۋدجەت تاراپىنان بولىنگەن قاراجاتتىڭ قالاي، قايدا جۇمسالىپ جاتقانىن ءبىلۋى ءتيىس.
باۋىرجان بايبەك 1 قاراشاعا دەيىن جاۋاپتى تۇلعالارعا اتقارۋشى ورگاندار مەن سالالىق قۇرىلىمداردىڭ قىزمەتىندەگى تيىمدىلىك، اشىقتىق جانە ەسەپ بەرۋدى جاقسارتۋدىڭ جول كارتاسىن قابىلداپ، بەكىتۋدى تاپسىردى. 

ازىرگە بۇل باستاما حالىقتىڭ باسىم كوپشىلىگىنىڭ نارازىلىعىن تۋدىرىپ وتىرعان دەنساۋلىق ساقتاۋ جانە ءبىلىم بەرۋ سالالارىنان باستالادى. كەيىن بارلىق قۇرىلىمدار حالىق الدىندا ب ا ق ارقىلى ەسەپ بەرەتىن بولادى.

دەرەككوز: قازاقپارات