تاياۋ ۋاقىتتا باعام ءبىر دوللار ءۇشىن 400 تەڭگەگە جەتۋى مۇمكىن. مۇنداي بولجامدى قوستانايلىق "ناشا گازەتا" باسىلىمىنا بەرگەن سۇحباتىندا ەكونوميكا عىلىمدارىنىڭ كانديداتى، ا.بايتۇرسىنوۆ اتىنداعى قمۋ عىلىم باسقارماسىنىڭ باسشىسى اندرەي كوۆال ايتتى. 

"مەن تەڭگەنىڭ قۇلدىراۋىن مۇناي باعاسىنىڭ تۇسۋىمەن بايلانىستىرىپ جاتقان ساراپشىلاردىڭ قاتارىنان ەمەسپىن. - دەپ مالىمدەدى ساراپشى. - ارينە، مۇناي باعاسى ۇلتتىق ۆاليۋتاعا ايتارلىقتاي اسەرىن تيگىزەدى، ءبىراق مەن، ءبىرىنشى كەزەكتە، تەڭگەنىڭ قۇلدىراۋىن ءوندىرىس سەكتورىمەن بايلانىستىرامىن. شاعىن جانە ورتا بيزنەس قىسىم كورىپ وتىر. ولاردى دامىتۋ ءۇشىن دامۋدىڭ ناقتى باعدارلامالارى قاجەت، ءبىراق ولار بىزدە قازىرگى ۋاقىتتا راسىمدەۋ ساتىسىندا. كرەديت-قارجى مەحانيزمدەرى دە جۇمىس ىستەمەيدى. ۇلتتىق بانك بولسا، وكىنىشكە قاراي، جاعدايعا پوستفاكتۋم اسەر ەتۋدى بىلەدى، ال مەحانيزمدەرى جوق".

ەكونوميستىڭ ايتۋىنشا، حالىق ۆاليۋتا نارىعىنداعى جاعدايعا ۇرەيمەن قاراپ وتىر، بۇل قاتەردىڭ بار ەكەنىن كورسەتەدى. "بارلىق وسى فاكتورلار تاياۋ ۋاقىتتا تەڭگەنىڭ ەكونوميكالىق دامۋ دەڭگەيىمىزگە سايكەس ورىنعا دەيىن باراتىنىنا اكەپ سوقتىرادى. سورىپ-قازىپ ساتۋدان ەمەس، ناقتى وندىرەتىن تاۋارىمىزعا بايلانىستى تابىس الامىز. 2016 جىلدىڭ ناۋرىزىندا دوللاردىڭ قۇنى 350 تەڭگەگە دەيىن جەتەدى دەپ ايتقانمىن، ءبىراق بولجامىم ەرتە ورىندالىپ قويدى. كەلەسى پسيحولوگيالىق سيفر - دوللار ءۇشىن 400 نەمەسە 500 تەڭگە بولادى، ال ەۋرونىڭ قۇنى ماڭىزدى بولماي قالادى. ادامدار دا، بيزنەس تە وسى جاعدايلاردا ءومىر ءسۇرىپ ۇيرەنۋى كەرەك. ۇلتتىق ۆاليۋتانىڭ نىعايۋىنا سەپ بولاتىنداي فاكتورلار جوق، مۇنايدىڭ دا قىمباتتاۋىنا سەبەپ جوق. مەنىڭشە، Brent ماركاسىنىڭ قۇنى باررەلىنە 15-10 دوللارعا دەيىن ءتۇسىپ كەتەدى، ال كەيىن كومىرسۋتەكتەر ەنەرگەتيكادا باسىم رولىنەن ايىرىلۋى دا مۇمكىن"، - دەدى ەكونوميست. 

ەسكە سالايىق، وتكەن اپتادا امەريكالىق ۆاليۋتانىڭ باعامى مۇناي باعاسىنىڭ تومەندەۋىنىڭ فونىندا ەلىمىزدە ايتارلىقتاي ءوستى. 14 جەلتوقساندا ايىرباس پۋنكتتەرى دوللاردى 340 تەڭگەگە ساتىپ جاتتى. كەلەسى كۇنى ۇلتتىق ۆاليۋتا قايتا نىعايىپ، دوللار ءۇشىن 335-337 كورسەتكىشىندە تۇردى.
 «قامشى» سىلتەيدى