بۇگىن الماتىدا 1986 جىلعى جەلتوقسان وقيعاسىنىڭ 29 جىلدىعىنا وراي، «تاۋەلسىزدىك تاڭى» مونۋمەنتىنە گۇل شوقتارىن قويىپ، تاعزىم ەتۋ ءراسىمى ۇيىمداستىرىلدى. 

شاراعا الماتى قالاسىنىڭ اكىمى باۋىرجان بايبەك، «نۇر وتان» پارتياسىنىڭ الماتى قالالىق فيليالى ءتوراعاسىنىڭ ءبىرىنشى ورىنباسارى زاۋرەش امانجولوۆا، قازاقستاننىڭ حالىق جازۋشىسى، كورنەكتى اقىن مۇحتار شاحانوۆ، كومپوزيتور حاسەن قوجاحمەت، جەرگىلىكتى مەملەكەتتىك ورگانداردىڭ باسشىلارى، جەلتوقسان وقيعاسىنا قاتىسۋشىلار جانە قالا تۇرعىندارى قاتىستى.

اسكەري وركەستردىڭ سۇيەمەلدەۋىمەن «تاۋەلسىزدىك تاڭى» مونۋمەنتىنە الماتى قالاسىنىڭ باسشىلىعى، الماتى جاستارى جانە جەلتوقسان وقيعاسىنا قاتىسۋشىلار اتىنان گۇل شوقتارى قويىلدى. بۇدان كەيىن ءبىر مينۋت ۇنسىزدىك جاريالاندى. سودان سوڭ، جەلتوقسان وقيعاسىندا قۇربان بولعان بوزداقتاردىڭ رۋحىنا باعىشتالىپ قۇران وقىلدى. شارا سوڭىندا «جۇلدىز» مەيرامحاناسىندا 1986 جىلعى جەلتوقسان وقيعاسىندا قۇربان بولعان بوزداقتاردى ەسكە الۋعا ارنالعان اس بەرۋ ۇيىمداستىرىلعاندىعى جانە بۇل ءۇشىن  ارنايى اۆتوبۋستاردىڭ بەلگىلەنگەنى جاريالاندى. شارادان شىققانداردىڭ ءبىرقاتارى سول اۆتوبۋستارعا وتىرىپ جاتتى. سونىمەن قاتار، جەلتوقسان وقيعاسىنا قاتىسۋشىلاردىڭ بەلسەندى مۇشەلەرى كەلگەن جۇرتشىلىققا جەلتوقسان وقيعاسىنا ارناپ پاتريوتتىق رۋحتا ولەڭدەر وقىپ بەردى.