Qadamynan janyp kún,

Qalamynan tamyp muń

Qaǵanaq jarǵan sáti bul

Aqpanda týǵan alyptyń

Sap taza altyn sáýleti,

Bolmasa da artyq dáýleti

Shattyqqa shomǵan kún búgin

Maqataev áýleti

Qas penen kózdiń arasy,

Silkinip qazaq dalasy

Óleńge aınalǵan tolǵaǵyn

Sezdi me eken anasy?

Aqıyǵysyń aspannyń

Ushynda túlegen asqardyń.

Aq burqaq atqan jyrlaryń

Qasıeti shyǵar aqpannyń,

Tabıǵaty da ózgeshe,

Aqyn da aqpan endeshe!

Ómirge kelgen ekenbiz

Sen búgin, Muqa men keshe!

Siltesem qolym jeterdeı

Muqańdar týǵan kókem ǵoı

Kúnimiz jalqy bolǵanmen

Aıymyz egiz eken ǵoı

Ǵumyrymdy jaýlap ot beıne,

Oılanam shyǵyp betkeıge.

Týylsam aqpan toǵyzy

Sizdeı bolar ma edim dep .

Bir aı, bir kún bóle bop

Ómirge kelsek bólek ed

Jazǵyram keıde ózimdi

Jata turmaǵam nege dep.

Sańqylyn estip qyrannyń

Dúbirin ańsap qulannyń

Maqataevty kórýge

Asyǵyp ketken shyǵarmyn!

Baryńda basyń tórlemeı,

Jalǵanǵa janyń boldy ógeı

Táýlikter bólip jatqanmen

Ózimizdi ómir bólmegeı!

Tanymaly aıtysker aqyn Qalıhan Qabdyrasoluly

2016-jyl Aqpannyń 9-jýldyzy .

- Almaty tańy