Nú-Iork polısıasynda qyzmet etetin qazaq Danıar Nurtaza bir jyl buryn álemdik aqparat quraldarynyń juldyzy boldy. Ol metro stansasynda tolǵaq qysqan amerıkandyq áıeldi týǵyzyp alǵan edi. Álemge áıgili bolǵan sol qandasymyz jaqynda esquire.kz jýrnalyna suhbat berdi.

AQSH-qa qalaı kelgenin, oǵan deıin nemen aınalysqanyn aıtqan Danıar alǵashqy ýaqytta jat jerde birshama qıyndyq kórgenin aıtady.

«Biz munda 13 jyl buryn, 2002 jyly keldik. Men 20 jasta, inim 17-de edi. İnim osynda, Kolýmbıa ýnıversıtetinde bilim alǵysy keldik. Barlyǵymyz sol úshin osynda birge kóship keldik. Men ol kezde aǵylshyn tilin bilmeıtin edim. Bárinen de jasy kelip qalǵan áke-sheshemizge aýyr soqty. Anamyz birneshe jyl qınalyp júrdi», - deıdi ol.

Danıar AQSH-qa barǵan bette ata-analarymen birge til úırengenderin, namystanbaı qara jumys ta istegenderin aıtady.

«Eki bólmeli páter jaldap turdyq. Bir bólmesinde ata-anamyz, ekinshisinde inim ekeýmiz turdyq. Páter ornalasqan aýdan da keremet aýdan boldy dep aıta almaımyz. Qaýipsiz de emes edi»,-degen ol Amerıkada turaqtap qalýlary áke-sheshesiniń arqasy ekenin jasyrmaıdy.

«İnim qazir otyzǵa keldi, ýnıversıtetti aıaqtady. İri bankte qarjylyq sarapshy bolyp qyzmet etedi. Keshke eki amerıkandyq ýnıversıtette statısıka, matematıka, mıkroekonomıka jáne táýekeldi-menedjmentten dárister oqıdy», - deıdi D. Nurtaza.

Daıashy, aýdarmashy, satýshy bolyp júrip polısıaǵa ornalasýdyń da ońaı bolmaǵanyn aıtady.

«Munda ornalasý úshin 4 jyl júgirdim. Aldymen eske saqtaý qabyletin, baıqaý qabyletin anyqtaıtyn jáne psıhologıalyq testter tapsyrdym. Odan jaqsy ótkesin dene daıyndyǵynan synaldym. Biraz salmaq tastaýǵa týra keldi. Bireýmen kelisý, synaqtan aqshamen ótý degen múldem múmkin emes eken. Qyzmetke qabyldanǵan soń 6 aılyq polısıa akademıasyna jiberedi. Ol jaqqa da básekelestik kúshti. Bir orynǵa 15 adamnan keledi», - deıdi ol.

Soǵan qaramastan, polısıanyń qyzmeti AQSH-ta eńbekaqysy joǵary qyzmet bolyp sanalmaıtynyn, munda azamattyq ómirge beıimdele almaı júrgen burynǵy áskerıler kóptep keletinin aıtady.

AQSH azamaty bolǵanymen Qazaqstan úshin jankúıer bolatynyn aıtqan Danıar: «Men-qazaqpyn. Qazaq bolyp týdym, qazaq bolyp qalamyn. Qaıda júrmesek te men ózimniń qaıda týǵanymdy, qaıda óskenimdi umytpaımyn»,- deıdi.