«Ýralskaıa nedelá» basylymynyń habarlaýynsha, Halyqaralyq áıelder meıramynan soń Batys Qazaqstan oblysyna Elbasy Nursultan Nazarbaev saparlap barmaq. Basylymnyń aıtýynsha, bul jańalyq oblys basshylyǵy úshin «kútpegen jaǵdaı» bolyp otyrǵany jáne bar.

Merekedenn soń Oralǵa aıaq astynan jetip baratyn elbasy oblys basshysyn ornynan alady eken. Oblys basshysy Nurlan Noǵaevtyń laýazymynan alynyp, Atyraý oblysyna ákim bolyp baratyny týraly áńgime óńirde jeldeı esýde. Buǵan Atyraý oblysynyń ákimi Baqtyqoja İzmuhamedovtyń «Nur Otan» tizimi boıynsha depýtattyqtan úmitker ekendigi jáne onyń sońǵy halyqqa esep berý kezdesýinde bul laýazymda uzaq otyrmaıtynyn ashyq aıtýy da sebep bolyp otyrǵan syńaıly.

Atyraý basshylyǵyna ketetin N. Noǵaevtyń ornyna kim keletinin de aımaqtaǵy sáýegeıler ózderinshe boljap jatqan kórinedi. BQO basshylyǵyna basty úmitkerdiń biri Halyq assambleıasy tóraǵasynyń orynbasary Eraly Toǵjanov bolsa, ekinshi úmitker Noǵaevtyń burynǵy birinshi orynbasary, búginde Prezıdent Ákimshiliginde qyzmet isteıtin Serik Shápkenov kórinedi.

Eraly Toǵjanovty oblys ákimdigine usynýshylar oblysta Assambleıa otyrysy ótedi degen josparǵa súıenetin sekildi. Bul boljamdy negizsiz dep aıtýǵa jáne bolmaıdy. Eraly Toǵjanov 2008 jyldan beri Assambleıa basshylyǵynda otyr. Segiz jyl boıy bir orynda otyrǵan Toǵjanovtyń ákimdikten dámesi joq deı almaısyz. Bul qyzmet oǵan jáne jat emes. Onyń 2001-2006 jyldar aralyǵynda Qaraǵandy oblysy ákiminiń orynbasary bolǵany bar. Assambleıa saıası uıym statýsyn ıelengeli de birneshe saılaý ótti. Toǵjanov osy saılaý naýqandaryn uıymdastyrý jumysynda da beıtarap qaldy deýge kelmeıdi. Prezıdentke Elbasy mártebesin zańmen bekitý, merziminen buryn saılaýlar ótkizý syndy kóptegen saıası bastamalarǵa osy Assambleıa uıytqy bolǵany belgili. Osy «eńbegi» úshin Prezıdent Toǵjanovqa ákim taǵyn usynýy ábden múmkin.